Կաթնամթերք արտադրող երեք կազմակերպություններից երկուսում արձանագրվել են խախտումներ

Հետագծելության սկզբունքն ապահովելու նպատակով Սննդամթերքի անվտանգության տեսչական մարմինը վերահսկողություն է իրականացրել երեք կազմակերպությունների՝ «Վանանդ», «Իգիթ» և «Վանուշ և Էդգար Հովհաննիսյաններ» ՍՊԸ-ներին պատկանող կաթնամթերքի արտադրություններում։ Այս մասին հայտնում են ՍԱՊԾ–ից։

Ստուգման ընթացքում իրականացվել են նմուշառումներ կաթնամթերքից և ներկայացվել լաբորատոր փորձաքննության։

Համաձայն հետազոտության արդյունքների՝ «Իգիթ» ՍՊԸ-ից վերցված «կաթ պարունակող մթերք՝ կաթնայուղի փոխարինիչով, պատրաստված Լոռի պանրի տեխնոլոգիայով Գեղամա» ապրանքատեսակը կաթնայուղի զանգվածային մասի ցուցանիշով համապատասխանել է Մաքսային միության տեխնիկական կանոնակարգի պահանջներին։

«Վանանդ» ՍՊԸ արտադրության «կաթ պարունակող մթերք՝ կաթնայուղի փոխարինիչով, պատրաստված աղաջրային պանրի տեխնոլոգիայով» արտադրատեսակի երկու խմբաքանակները (արտադրված՝ 10.11.2025 և 05.11.2025), ինչպես նաև «Վանուշ և Էդգար Հովհաննիսյաններ» ՍՊԸ-ի «կաթ պարունակող մթերք՝ կաթնայուղի փոխարինիչով, պատրաստված աղաջրային պանրի տեխնոլոգիայով Ջաջուռ» արտադրատեսակը (արտադրված՝ 11.11.2025) չեն համապատասխանել Մաքսային միության տեխնիկական կանոնակարգի պահանջներին։ Այդ արտադրանքներում կաթնայուղի զանգվածային մասն արձանագրվել է 1-5 ટકા, ինչի հետևանքով դրանք համարվում են վտանգավոր և կեղծված սննդամթերք։

Տնտեսավարողներին տրվել են կարգադրագրեր՝ նշված խմբաքանակների վերադարձի, օգտահանման և/կամ ոչնչացման վերաբերյալ։

Այլ արտադրողների արտադրանքի լաբորատոր փորձաքննության արդյունքները կներկայացվեն հետագայում։

Տեսչական մարմինը հայտարարում է, որ լինելու է հետևողական, և խախտում թույլ տված կազմակերպությունները պատժվելու են օրենքի ողջ խստությամբ։

Ի գիտություն. Մաքսային միության «Կաթի և կաթնամթերքի անվտանգության մասին» 033/2013 տեխնիկական կանոնակարգը պահանջում է, որ «կաթնային ճարպի փոխարինիչով կաթ պարունակող մթերք»-ում կաթնային ճարպի փոխարինումը կաթնային ճարպի փոխարինիչով թույլատրվում է միայն 50 տոկոսից ոչ ավելի քանակությամբ։

«Սննդամթերքի անվտանգության մասին» ՀՀ օրենքով վտանգավոր է համարվում այն սննդամթերքը, որը պիտանի չէ սպառման և կարող է վնասել մարդու կյանքն ու առողջությունը։ Օրենքը արգելում է ներմուծել, արտադրել, իրացնել կամ օգտագործել վտանգավոր և կեղծված սննդամթերք կամ նյութեր։

Նույն օրենքի համաձայն՝ կեղծված է համարվում սննդամթերքը, որի բաղադրությունը կամ մակնշումը փոփոխվել է առանց անհրաժեշտ համապատասխանության, որը պատրաստվել է այլ նյութերի ներառմամբ՝ պահանջներին չհամապատասխանող արտադրանքը թաքցնելու նպատակով, կամ որի մակնշման մեջ առկա է ոչ ճիշտ նշում սննդամթերքի հատուկ նշանակության մասին։