Քննարկում էր նաև պայթյունի հնարավորության տարբերակը. Ազատի զինվորական կացարանի հրդեհի գործով փորձագետ

Գեղարքունիքի մարզի ընդհանուր իրավասության դատարանում այսօր շարունակվում է Ազատ գյուղի զինվորական կացարանում զոհված 15 զինծառայողների գործով դատական հերթական նիստը։ Հարցաքննվում են փորձագետները։

Փորձաքննությունների ազգային բյուրոյի պայթյունատեխնիկական, պայթյունատեխնոլոգիական և հրդեհատեխնիկական փորձաքննությունների բաժնի պետ  Դավիթ Մելքումյանն ասաց, որ դեպքի վայրում եղել է դեպքի օրը, մասնացել է  դեպքի վայրի զննությանը։

«Կոնկրետ  հրավիրվել եմ զինվորական քննչական գլխավոր վարչության  պետի տեղակալի՝ Ասլանյանի կողմից։ Լույսը բացած էր, որ տեղ ենք հասել։ Դեպքի վայրում արդեն իսկ կատարվում էին որոշակի քննչական գործողություններ»,- պատասխանելով տուժողների շահերի ներկայացուցիչ Նորայր Նորիկյանի հարցերին՝ ասաց նա։

Նորիկյանի խոսքով, կարևոր է հստակ նշել ժամ, թե քանիսին է հասել դեպքի վայր. «Ինչո՞վ են պայմանավորված նման հարցերը։ Պայմանավորված է  հետևյալով, որ  տուժող կողմի մոտ ոչ միայն առկա է համոզմունք,  այլ դրա վերաբերյալ կա նաև հավաստում առ այն, որ դեպքի վայրն ի սկզբանե խախտված է եղել»։

Մելքումյանը կրկնեց, որ կոնկրետ ժամը չի կարող նշել։

«Մեր՝  դեպքի վայր ժամանելու պահին դիակներն արդեն դեպքի վայրում չէին։ Հրդեհը մարված էր, դիակները տեղափոխված էին։ Պարզ է, այդ ընթացքում հնարավոր էր դեպքի վայրի որոշակի աղավաղում տեղի ունենար»,- ասաց նա։

Փորձագետի ներկայացմամբ, շինության նախամուտքն ամբողջությամբ՝ առաստաղ, տանիք, հատակ, այրված էր։ Ինչ վերաբերում է  զուտ կացարանին, որտեղ եղել են զինվորները, փորձագետն ասաց, որ տանիք, առաստաղ, հետևի պատ քանդված էր, հատակին առկա էր այրված մնացորդներ։

«Նշանակված փորձաքննությունը, կոնկրետ իմ մասով, դա պայթյունատեխնիկական, հրդեհատեխնիկական փորձաքննությունն էր, այսինքն, ըստ երևույթին, նախաձեռնող կողմը քննարկում էր նաև պայթյունի հնարավորության տարբերակը։ Մեր կողմից դեպքի վայրի հետազոտման ժամանակ կատարվել է  նմուշառում, հետագայում լաբորատոր հետազոտման է ենթարկվել, ըստ որի՝ դեպքի վայրից վերցված նմուշներում պայթուցիկ նյութի հետքեր չեն հայտնաբերվել, իսկ դեպքի վայրում պայթյունին բնորոշ հետքեր նույնպես չեն հայտնաբերվել»,- ասաց Դ.Մելքումյանը։ 

Ն. Նորիկյանն ասաց, որ տուժողների մոտ կա որոշակի կասկած, որ տեղի է ունեցել պայթյուն. «Կացարանում որևէ այլ կողմնակի՝ հրթիռ, տարբեր զինատեսակից կրակոց, պայթյուն,... ինչ կարող եք ասել այս առումով»։ 

«Նմանատիպ պայթյուններ, ելնելով հետազոտության արդյունքներից, չեն եղել»,- ասաց փորձագետը։ 

«Ենթադրենք տեղի է ունեցել պայթյուն, դրա հետևանքը կարո՞ղ եք նկարագրել, ինչով կտարբերվեր այս դեպքից»,- հարցրեց Նորիկյանը։ 

«Հրթիռ, ական արձակվելու դեպքում կունենայինք պայթյունի օջախ։ Խառնարան է առաջացնում»,- ասաց փորձագետը։

Նորիկյանը լուսանկար ցուցադրեց՝ նշելով, որ  կացարանի մուտքի մոտ՝ պատուհանի, դռան գրեթե մեջտեղում, կա փոսանման պատկեր, որը, ենթադրաբար, կարող է լինել պայթյունի հետևանքով առաջացած փոս։ 

«Նշված փոսերը մեր կողմից հետազոտվել են, նշվել է, որ դա ոչ թե պայթյունից առաջացած փոսեր են, այլ միջանցիկ այրուտներ»,- բացատրեց Դ.Մելքումյանը։

Հիշեցնենք, որ 2023-ին հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում  տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել էր 15 ժամկետային զինծառայող, 7 զինծառայող տեղափոխվել էր հոսպիտալ: