Ճամբարակ–Թթուջուր հատվածում բռնկված հրդեհը քանի օր է մոլեգնում է,հրդեհաշիջման աշխատանքներին ներգրավված են ՊՆ ուղղաթիռ, անօդաչու սարքեր

Գեղարքունիքի մարզի Ճամբարակ–Թթուջուր հատվածում բռնկված հրդեհը քանի օր է մոլեգնում է, Արտակարգ իրավիճակների կառավարումը չի ստացվում ՆԳՆ գերատեսչական կառույցի մոտ։ 1 շաբաթ առաջ բռնկված հրդեհը ընդլայնում է այրվող մակերեսը, հարյուրավոր հեկտարներ այրած կրակը հասել է Գեղարքունիքի սահմանամերձ հատվածից մինչև Տավուշի անտառներ։

ՆԳՆ-ն, հասցեագրելով ֆեյսբուքյան օգտատերերի ու լրագրողների ահազանգերին, արձագանքելու համար միայն հաղորդեց արդեն մեկ շաբաթ տևող հրդեհի մասին։

Այսօր առավոտյան հերթական հաղորդագրությունն է տարածել շրջակա միջավայրի նախարարությունը՝ Ճամբարակ–Թթուջուր հատվածում բռնկված հրդեհը հասել է «Հայանտառ» ՊՈԱԿ-ի «Ճամբարակի անտառտնտեսություն» մասնաճյուղի Գետիկի անտառպետության 1-ին, 2-րդ և 4-րդ պահաբաժիններ՝ այրելով խոտածածկ տարածքներ և ծառեր։

Հրդեհի մարման աշխատանքներին մասնակցել են ՆԳՆ փրկարար ծառայության մեծ թվով մարտական հաշվարկներ և ուղղաթիռ, ինչպես նաև ՇՄՆ էկոպարեկային ծառայության Կոտայքի և Գեղարքունիքի մարզային վարչությունների աշխատակիցները։ Տեղանքի բարդ ռելիեֆի պատճառով մի շարք հատվածներում կրակի մարման աշխատանքներն իրականացվել են անհատական միջոցներով։

Որոշ հատվածներում հաջողվել է կասեցնել կրակի տարածումը, սակայն չոր և քամոտ եղանակը թույլ չի տվել ամբողջությամբ մարել հրդեհը, ասվում է հաղորդագրության մեջ։

Նախնական տվյալներով՝ այրվել են Գետիկի անտառպետության 1-ին, 2-րդ և 4-րդ պահաբաժինների որոշ տարածքներ, իսկ կրակը շարունակում է շարժվել Դպրաբակի անտառպետության 6-րդ պահաբաժնի ուղղությամբ։

Հրդեհաշիջման աշխատանքները շարունակվում են։