Երկու կալանավոր փախել է բանտից՝ սղոցելով ճաղերը և իջնելով սավաններից պատրաստած պարանի օգնությամբ

Ֆրանսիայի Դիժոն քաղաքում փնտրվում են երկու կալանավոր, որոնք նոյեմբերի 27-ին փախուստ են կատարել տեղական բանտից։ Ինչպես գրում է La Dépêche-ը, կալանավորները սղոցել են խցի պատուհանի մետաղյա ճաղերը և ներքև իջել սավաններից պատրաստված ինքնաշեն պարանի միջոցով։ Տղամարդիկ կալանքի տակ էին՝ սպասելով դատավարությանը։

Փախուստի մասնակիցներից մեկը՝ 19-ամյա երիտասարդը, բանտում էր 2024 թվականի հոկտեմբերից՝ թմրանյութերի հետ կապված սպանության փորձի մեղադրանքով։ Երկրորդը՝ 34-ամյա կալանավորը, պահվում էր 2023 թվականի ապրիլից՝ զուգընկերոջ նկատմամբ բռնության և սպառնալիքների գործով։ Բանտի աշխատակիցները նշել են, որ փախուստը կանխատեսելի էր, քանի որ նախկինում արդեն մի քանի անգամ առգրավվել էին սղոցներ, իսկ բանտի ճաղերը համարվել են հին և անբավարար ամրության։

Դիժոնի բանտը գտնվում է ծանր գերբնակեցված վիճակում․ 180 մարդու համար նախատեսված շենքում այժմ պահվում է 311 կալանավոր, իսկ շինությունը տարիներ շարունակ չի վերանորոգվել։ Նման դեպքեր տեղի են ունեցել նաև ուրիշ երկրներում․ վերջերս Ավստրալիայում նույնպես բերման ենթարկվեց տղամարդ, որը երեք ամիս թաքնվել էր ոստիկանությունից՝ փախուստի դիմելով նույն եղանակով՝ սավաններով պատրաստված պարանով։