Ի՞նչ վիճակում է այսօր հարձակման ենթարկված հանրային գործիչ Միհրան Հակոբյանը. մանրամասներ

Հասարակական-քաղաքական գործիչ Միհրան Հակոբյանն այժմ զննություն է անցնում՝ «Իզրմիրլյան» ԲԿ-ում։ Նրա վիճակը, նախնական տվյալներով, միջին ծանրության է գնահատվում։ Այս մասին «Փաստինֆո»-ի հետ զրույցում հայտնեցին ԲԿ-ից։

Գործիչը հիմնականում վնասվածքներ է ստացել դեմքի և գլխի շրջանում։ Այս պահին դեռևս պարզ չէ՝ Հակոբյանը կշարունակի մնալ հոսպիտալացված, թե ոչ։ «Փաստինֆո»-ն տեղեկացավ, որ այս պահին ոստիկանության ծառայողները ԲԿ-ում են, հանգամանքները պարզվում են։ 

Հիշեցնենք, որ այսօր «Դալմա մոլ»-ի ավտոկայանատեղիում տեղի է ունեցել բանդիտական հարձակում հանրային գործիչ Միհրան Հակոբյանի վրա։ Իրավապաշտպան Ռուբեն Մելիքյանը հայտնել է, որ հարձակվողները եղել են դիմակներով և անսպասելի հարձակվել են թիկունքից։ Մելիքյանի խոսքով՝ այս հարձակումը տեղի չէր ունենա, եթե իրավապահները բացահայտած լինեին 2021թ-ին Միհրանի տան առջև նռնակ նետելու հանցանքը։ ՆԳՆ-ից «Փաստինֆո»-ի հետ զրույցում հայտնել էին,  որ «Իզմիրլյան» բժշկական կենտրոնից Համայնքային ոստիկանության Մալաթիայի բաժին ահազանգ է ստացվել, որ Երևանի մոլերից մեկի ավտոկայանատեղիից իրենց մոտ բուժօգնության է տեղափոխվել մի քաղաքացի։ ՆԳՆ-ից հայտնում են, որ ձեռնարկվում են միջոցառումներ դեպքի հանգամանքները պարզելու ուղղությամբ։