Ամանորին սրտի կաթվածների աճի անսպասելի պատճառը բացահայտվել է

Նոր տարվա և Սուրբ Ծննդյան տոների ընթացքում սրտի կաթվածների ռիսկը կտրուկ բարձրանում է․ զգուշացնում են բժիշկները։ Ամերիկյան շտապօգնության ծառայության American Medical Response տվյալներով՝ սրտաբանական կանչերի թիվը մոտ 30 տոկոսով աճում է արդեն Սուրբ Ծննդյան նախօրեին, իսկ American Heart Association ուսումնասիրությունները ցույց են տալիս, որ ինֆարկտից մահացությունների ամենաբարձր ցուցանիշը գրանցվում է դեկտեմբերի վերջին շաբաթում՝ հատկապես դեկտեմբերի 26-ին և հունվարի 1-ին։ Հետազոտության արդյունքները հրապարակվել են Circulation գիտական ամսագրում։

Մասնագետները աճը կապում են միանգամից մի քանի գործոնների հետ՝ չափից շատ սնունդ ու աղ, ալկոհոլի օգտագործում, հուզական լարվածություն, ցուրտ եղանակ, որը ստիպում է սրտին ավելի ինտենսիվ աշխատել, ինչպես նաև բժշկական օգնությանը ժամանակին չդիմելը։ Բժիշկների խոսքով՝ շատերը անտեսում են վտանգավոր ախտանշանները՝ չցանկանալով «փչացնել տոնական տրամադրությունը»։

Սրտի կաթվածի դասական նշանները միշտ չէ, որ ակնհայտ են․ կրծքավանդակի ցավից կամ ճնշումից բացի կարող են լինել շնչահեղձություն, անհանգստություն ձեռքերում, մեջքում, պարանոցում կամ ծնոտում, սառը քրտինք, սրտխառնոց, գլխապտույտ և հանկարծակի ուժասպառություն։ Բժիշկները շեշտում են, որ նման դեպքերում հաշիվը գնում է րոպեների վրա։ Տոնական օրերին խորհուրդ է տրվում պահպանել չափավորություն սննդի և ալկոհոլի մեջ, չմոռանալ նշանակված դեղերի մասին և խուսափել ցրտի մեջ կտրուկ ֆիզիկական ծանրաբեռնվածությունից՝ հիշելով, որ դրական հույզերը օգտակար են միայն այն դեպքում, երբ օրգանիզմի վտանգի ազդակները չեն անտեսվում։