«Հայաստանի անկախության 35-ամյակին նվիրված ընդունելությունը Փարիզում տպավորիչ էր իր բարձր մակարդակով և ջերմ մթնոլորտով». Վրույր Փենեսյան

Սեպտեմբերի 30-ին Փարիզի Le Grand InterContinental Paris հյուրանոցի հանդիսությունների սրահում տեղի է ունեցել Հայաստանի Հանրապետության անկախության 35-ամյակին նվիրված պաշտոնական ընդունելություն՝ Ֆրանսիայում ՀՀ դեսպանության կազմակերպմամբ։

Միջոցառմանը մասնակցել են Ֆրանսիայի պետական և քաղաքական շրջանակների ներկայացուցիչներ, միջազգային կազմակերպությունների և դիվանագիտական առաքելությունների բարձրաստիճան ներկայացուցիչներ, սենատորներ, Ազգային ժողովի պատգամավորներ, մշակույթի և գործարար աշխարհի ներկայացուցիչներ, ինչպես նաև Ֆրանսիայի հայ համայնքի և Հայաստանի բարեկամների լայն շրջանակը։

Երեկոն մեկնարկել է Հայաստանի և Ֆրանսիայի պետական օրհներգերի կատարմամբ՝ Ֆրանսիայի Հանրապետական գվարդիայի երգչախմբի մասնակցությամբ։ Միջոցառման ընթացքում ելույթներով հանդես են եկել Ֆրանսիայում ՀՀ արտակարգ և լիազոր դեսպան Արման Խաչատրյանը և Ֆրանսիայի լիազոր նախարար Էլեոնոր Կարուան։ Պաշտոնական հատվածին հաջորդել է մշակութային ծրագիր՝ Հանրապետական գվարդիայի երգչախմբի և «Արև» քառյակի մասնակցությամբ։

Ընդունելությանը ներկա է եղել նաև «Հայաստան-Մոնակո համագործակցության խորհրդի» նախագահ Վրույր Փենեսյանը, ով բարձր է գնահատել միջոցառման կազմակերպման մակարդակն ու երեկոյի մթնոլորտը։

«Մեծ պատիվ և հաճույք էր ներկա գտնվել Հայաստանի Հանրապետության անկախության 35-ամյակին նվիրված այս բարձրակարգ և հիշարժան ընդունելությանը։ Միջոցառումը տպավորիչ էր իր կազմակերպչական բարձր մակարդակով, պաշտոնական ու միաժամանակ ջերմ մթնոլորտով և գեղեցիկ մշակութային ծրագրով»,– նշել է Վրույր Փենեսյանը։

Նա իր շնորհակալությունն է հայտնել ՀՀ դեսպանությանը և դեսպան Արման Խաչատրյանին՝ Հայաստանի անկախության կարևոր հոբելյանը Փարիզում նման բարձր մակարդակով նշելու և հայ-ֆրանսիական բարեկամության ու համագործակցության գաղափարը ևս մեկ անգամ ընդգծելու համար։

Դեսպան Արման Խաչատրյանի արդյունավետ առաքելությունն ու անձնական ներդրումն այսօր նոր լիցք են հաղորդում Հայաստանի և Ֆրանսիայի միջև առկա խորը փոխվստահությանն ու համագործակցությանը: