ԱՄՆ-ում գտել են երկու գլխանի փոքրիկ կրիա․ մասնագետները հետևում են հազվագյուտ անոմալիային

ԱՄՆ Մասաչուսեթս նահանգում հայտնաբերել են ադամանդակող կրիայի ձագ՝ երկու գլխով, հայտնել է UPI-ն։

Հազվագյուտ փոքրիկ կրիան այժմ գտնվում է Cape Wildlife Center կենտրոնի մասնագետների հսկողության տակ, որոնք փորձում են հասկանալ, թե ինչպես են երկու գլուխն ու մեկ մարմինը համակարգում իրենց աշխատանքը միմյանց հետ։

Փոքրիկ կրիային գտել են պահպանվող տարածքում, որտեղ այս կենդանիները ձու են դնում, Ուելֆլիթ քաղաքում։ Այն կենտրոն են հասցրել Mass Audubon Wellfleet Bay Wildlife Sanctuary բնապահպանական կազմակերպության աշխատակիցները։

Մասնագետներն անսովոր առանձնահատկությունը բացատրել են հազվագյուտ բնածին անոմալիայով՝ բիցեֆալիայով։ Այսպիսի զարգացման խանգարման դեպքում սաղմի մոտ մեկի փոխարեն ձևավորվում է երկու գլուխ։

«Մեր անասնաբուժական թիմն ուշադիր կհետևի փոքրիկ կրիային, որպեսզի ավելի լավ իմանա, թե ինչպես են նրա երկու գլուխն ու մարմինն աշխատում միասին», — հայտնել են Cape Wildlife Center-ի աշխատակիցները։

Առայժմ մասնագետներն առաջին հերթին հետևում են, թե ինչպես է կենդանին ուտում, աճում և պահում իրեն։

Նման դեպքերը չափազանց հազվադեպ են։ Կենտրոնի տվյալներով՝ վերջին հինգ տարիների ընթացքում նրա աշխատակիցները բախվել են ընդամենը երկու նման դեպքի։

Մասնագետների խոսքով՝ յուրաքանչյուր այսպիսի կրիա գիտնականներին հնարավորություն է տալիս ավելի լավ ուսումնասիրել նման խանգարումներ ունեցող կենդանիների զարգացման առանձնահատկությունները, անատոմիան և ֆիզիոլոգիան։

Առայժմ անհայտ է, թե որքան լավ կկարողանա հայտնաբերված փոքրիկ կրիան համակարգել շարժումներն ու օրգանիզմի մյուս գործառույթները։ Անասնաբույժները կշարունակեն հետևել նրան՝ նրա աճին զուգընթաց։