Սերժ Սարգսյանի պաշտոնավարման տարիներին «Վանա լիճ դրախտ» համալիրի օտարման գործով քրեական վարույթ է նախաձեռնվել

Հայաստանում նոր քրեական վարույթ է նախաձեռնվել՝ կապված «Վանա լիճ դրախտ» հանգստի գոտու օտարման գործընթացի հետ։

Գլխավոր դատախազության տվյալներով՝ 2004 թվականին ՀՀ պաշտպանության նախարարության հաշվեկշռում գտնվող՝ Արագածոտնի մարզում տեղակայված հանգստի գոտին օտարվել է ֆիզիկական անձի՝ 500 հազար ԱՄՆ դոլարով։ Այդ ժամանակ պաշտպանության նախարարի պաշտոնը զբաղեցնում էր Սերժ Սարգսյանը։

Ըստ դատախազության՝ գույքն օտարվել է առանց սահմանված կարգով գնահատման։ Մեկ տարի անց նույն անշարժ գույքի լուծարային արժեքը գնահատվել է 700 հազար դոլար։

Դատախազությունը նաև պարզել է, որ առանց իրավական և պայմանագրային հիմքերի 2,56 հա հողատարածքի վարձակալության իրավունք է գրանցվել ֆիզիկական անձի անունով, իսկ հետագայում հողատարածքը ձեռք է բերվել նրա սեփականության իրավունքով։ Հողամասի կադաստրային արժեքը կազմել է 115 մլն 814 հազար 400 դրամ։

Դեպքի առթիվ նախաձեռնվել է քրեական վարույթ։