Շիրակում երեք անձի մոտ մեծ քանակի թմրանյութ է հայտնաբերվել․ 2-ը ձերբակալվել են

Քրեական ոստիկանության Շիրակի մարզային վարչության ծառայողները օպերատիվ տեղեկություն էին ստացել, որ Գյումրիի 36-ամյա բնակիչը զբաղվում է թմրանյութերի ապօրինի ձեռքբերմամբ, պահմամբ և իրացմամբ։

Հետագա միջոցառումների արդյունքում տեղեկություններ են ստացվել նաև, որ նրա 57-ամյա հորեղբայրն ու 48-ամյա ընկերը տարբեր հասցեներում պահում են մեծ քանակի թմրանյութ։

Քրեական վարույթի շրջանակում իրականացված գործողությունների արդյունքում սեպտեմբերի 28-ին Վահրամաբերդ գյուղում 57-ամյա տղամարդու շինությունում հայտնաբերվել է ավելի քան 50 գրամ մարիխուանա, թմրանյութ պատրաստելու պարագաներ և կանեփի 17 բույս։

48-ամյա տղամարդու տանը հայտնաբերվել է ընդհանուր 93 գրամ մարիխուանա և տարաներում լցված՝ ավելի քան 200 գրամ մարիխուանա։

Գյումրիի 36-ամյա բնակչի տանը հայտնաբերվել են մեթադոնային լուծույթով սրվակ, ավելի քան 700 գրամ մարիխուանա, կաթուցիչներ, կանեփի սերմեր, ինչպես նաև սպիտակ փոշենման և բյուրեղանման զանգվածներ։ Շենքի հետնամասի տնակում հայտնաբերվել է ևս մոտ 200 գրամ մարիխուանա։

36-ամյա տղամարդն ու նրա հորեղբայրը ձերբակալվել են։ Նախաքննությունը շարունակվում է։