Ալիևը նոր պահանջ է ներկայացրել Հայաստանին․ բացե՛ք արխիվներն ու տվեք ամբողջ տեղեկատվությունը

Հայաստանը պետք է տրամադրի անհետ կորած ադրբեջանցիների ճակատագրի, ինչպես նաև զանգվածային և անհատական գերեզմանների գտնվելու վայրերի վերաբերյալ ամբողջ տեղեկատվությունը։ Այս մասին հայտարարել է Ադրբեջանի նախագահ Իլհամ Ալիևը։

Նրա խոսքով՝ թեև հակամարտությունն ավարտվել է, անհետ կորածների ճակատագրի պարզումը շարունակում է մնալ Ադրբեջանի առաջնահերթ հարցերից մեկը։

Ալիևը նշել է, որ Ադրբեջանի կողմից «ինքնիշխանության և տարածքային ամբողջականության լիարժեք վերականգնումը», ինչպես նաև երկրի վարած քաղաքականությունը, իր գնահատմամբ, պատմական հնարավորություն են ստեղծել Հարավային Կովկասում կայուն խաղաղության և համագործակցության համար։

Նա այդ ուղղությամբ կարևոր քայլեր է համարել 2025 թվականի օգոստոսի 8-ին Վաշինգտոնում, ԱՄՆ նախագահի մասնակցությամբ, Ադրբեջանի և Հայաստանի միջև ստորագրված համատեղ հռչակագիրը, ինչպես նաև երկու երկրների միջև խաղաղության համաձայնագրի նախաստորագրումը։

Ադրբեջանի նախագահի խոսքով՝ կայուն խաղաղության հաստատումը պահանջում է ոչ միայն քաղաքական պայմանավորվածություններ, այլև վստահության ամրապնդում և հակամարտության հումանիտար հետևանքների հաղթահարում։

Ալիևը պնդել է, որ Հայաստանի հետ հակամարտության հետևանքով անհետ կորած է համարվում 4010 ադրբեջանցի, այդ թվում՝ երեխաներ, կանայք և տարեցներ։ Նա նաև հայտարարել է, որ Կարմիր խաչի միջազգային կոմիտեի գործունեությունն այդ ուղղությամբ արդյունք չի տվել։

Նրա խոսքով՝ պատերազմից հետո ստեղծվել են նոր հնարավորություններ անհետ կորած քաղաքացիների որոնման համար, և Ադրբեջանի համապատասխան պետական հանձնաժողովն ակտիվացրել է աշխատանքները՝ նրանց գտնվելու վայրերը պարզելու և զանգվածային գերեզմաններ հայտնաբերելու նպատակով։

Ալիևը հայտարարել է, որ Ադրբեջանը շարունակելու է օգտագործել բոլոր հնարավոր միջոցները անհետ կորածների ճակատագիրը պարզելու համար՝ ընդգծելով, որ նրանցից ոչ մեկը մոռացված չէ։

Նա նաև կոչ է արել Հայաստանին տրամադրել անհետ կորած ադրբեջանցիների ճակատագրի, զանգվածային և անհատական գերեզմանների գտնվելու վայրերի վերաբերյալ առկա տեղեկությունները, ինչպես նաև ապահովել համապատասխան արխիվների հասանելիությունն ու աջակցել վկաների ցուցմունքների հավաքագրմանը։