Գագիկ Խաչատրյանին վերագրվող կտավների մի մասը պատկանել է ընտանիքի անդամներին և ստացվել որպես նվեր․ փաստաբաններ

Գագիկ Խաչատրյանի փաստաբանական խումբը պնդում է, որ նրան վերագրվող 70 կտավներից մի մասը չի պատկանել ՊԵԿ նախկին նախագահին, այլ ընտանիքի այլ անդամների, որոնք դրանք տարբեր ժամանակներում ստացել են որպես նվեր։

Փաստաբանների հայտարարության համաձայն՝ կտավները առգրավվել են Խաչատրյանների ընտանիքին պատկանող բնակարանից, որտեղ պահվել են ընտանիքի տարբեր անդամներին պատկանող արվեստի գործեր։

Պաշտպանական կողմը մտահոգություն է հայտնել Քննչական կոմիտեի գործողությունների վերաբերյալ՝ դրանք համարելով ոչ իրավաչափ և նշելով, որ դրանք խախտում են կտավների սեփականատերերի սեփականության և մասնավոր կյանքի գաղտնիության իրավունքները։

Փաստաբանները նաև պնդում են, որ մինչ այժմ վարույթն իրականացնող մարմինը կտավների ծագման և օրինականության վերաբերյալ պարզաբանումներ չի ստացել ընտանիքի անդամներից, իսկ սեփականատերերին կամ նրանց փաստաբաններին չեն տրամադրվել կտավները որպես իրեղեն ապացույց ճանաչելու և Ազգային պատկերասրահին ի պահ հանձնելու վերաբերյալ որոշումները։

Պաշտպանական կողմի պնդմամբ՝ օրենքը նախատեսում է, որ եթե իրեղեն ապացույցները վարույթն իրականացնող մարմինը չի կարող պահել իր մոտ, դրանք առաջնահերթ կարգով պետք է վերադարձվեն կամ ի պահ հանձնվեն դրանց օրինական տիրապետողներին։

Փաստաբանները նաև դեմ են արտահայտվել կտավների՝ Ազգային պատկերասրահում հանրային ցուցադրությանը՝ նշելով, որ դրանք, իրենց գնահատմամբ, պետք է միայն պահպանվեն, իսկ ցուցադրությունը կարող է խախտել սեփականատերերի իրավունքները։

Խաչատրյանների փաստաբանական խումբը հայտնել է, որ նշված հարցերի պարզաբանման նպատակով գրավոր հարցում է ուղարկել Քննչական կոմիտե և պատասխանը ստանալուց հետո անհրաժեշտության դեպքում հանդես կգա լրացուցիչ հայտարարությամբ։