Դատարանը Oragir News-ից և Հայկ Դեմոյանից պահանջել է հրապարակային ներողություն խնդրել Արայիկ Հարությունյանից

Երևան քաղաքի առաջին ատյանի ընդհանուր իրավասության դատարանը բավարարել է ՀՀ վարչապետի աշխատակազմի նախկին ղեկավար Արայիկ Հարությունյանի հայցը «Օրագիր Մեդիա» ՍՊԸ-ի դեմ՝ վիրավորանքի համար հրապարակային ներողություն խնդրելու և փոխհատուցում վճարելու պահանջների վերաբերյալ։

Դատարանի որոշմամբ՝ «Օրագիր Մեդիա» ՍՊԸ-ն պարտավորվել է «Օրագիր» ֆեյսբուքյան էջում և oragir.news կայքում առնվազն 30 օր հրապարակել հայտարարություն՝ նշելով, որ 2025 թվականի հուլիսի 18-ի հրապարակումը պարունակել է Արայիկ Հարությունյանին վիրավորող արտահայտություն, ինչի համար ընկերությունը ներողություն է խնդրում։ Ընկերությունը նաև պարտավորվել է փոխհատուցում վճարել Հարությունյանին։

Մեկ այլ դատական գործով դատարանը բավարարել է Արայիկ Հարությունյանի հայցն ընդդեմ Հայկ Դեմոյանի՝ զրպարտություն հանդիսացող տեղեկությունների հրապարակային հերքման և փոխհատուցման պահանջների վերաբերյալ։

Դեմոյանը պարտավորվել է իր ֆեյսբուքյան էջում հերքել 2026 թվականի հունվարի 16-ի գրառմամբ տարածված տեղեկությունները։ Հերքման մեջ պետք է նշվի, որ Արայիկ Հարությունյանի վերաբերյալ «Հայոց ցեղասպանության թանգարանում ավազակային ներխուժում կատարող, աշխատավարձ յուրացնող ու գողություններ հովանավորող» ձևակերպումները զրպարտություն են և չեն համապատասխանում իրականությանը։

Հերքումը պետք է հրապարակված մնա առնվազն մեկ տարի՝ առանց մեկնաբանությունների հնարավորության։ Դեմոյանը ևս պարտավորվել է փոխհատուցում վճարել Հարությունյանին։

Նշվում է, որ երկու վճիռներն էլ չեն բողոքարկվել և մտել են օրինական ուժի մեջ։