ԱՄՆ-ի առաջարկը Թեհրանի սեղանին է․ Արաղչին մանրամասներ է հայտնել

Իրանը առաջիկա օրերին կպատասխանի ԱՄՆ-ի առաջարկին, հայտարարել է երկրի արտաքին գործերի նախարար Աբբաս Արաղչին, հաղորդում է Tasnim-ը։

Նրա խոսքով՝ Թեհրանի և Վաշինգտոնի միջև անուղղակի բանակցությունները շարունակվում են երրորդ կողմերի միջնորդությամբ։

«Մենք ներկայացրել ենք «յոթօրյա ծրագիր» անվանմամբ մեր առաջարկը, ինչպես նաև լսել ենք ամերիկյան կողմի պատասխան դիրքորոշումը», — հինգշաբթի լրագրողներին ասել է Արաղչին։

Նախարարի խոսքով՝ այժմ իրանական կողմն ուսումնասիրում է ԱՄՆ-ից ստացված առաջարկները և ակնկալում է իր պատասխանը ներկայացնել առաջիկա մի քանի օրվա ընթացքում։

Արաղչին ընդգծել է, որ բանակցային գործընթացը շարունակվում է, և կողմերը նախկինի պես ուղերձներ են փոխանակում միջնորդների միջոցով։ Ընդ որում, նա չի հստակեցրել ամերիկյան առաջարկի բովանդակությունը և չի նշել ուղերձների փոխանցմանը մասնակցող երկրների անունները։

ԱՄՆ-ի հետ տարաձայնությունների կարգավորմանն ուղղված դիվանագիտական ջանքերի շրջանակում Իրանը ավելի վաղ ներկայացրել էր «յոթօրյա ծրագիրը»։ Երկու երկրների միջև բանակցություններն ընթանում են անուղղակի ձևաչափով․ Թեհրանի և Վաշինգտոնի ներկայացուցիչները ուղղակի երկխոսություն չեն վարում, այլ իրենց դիրքորոշումները փոխանցում են միջնորդների միջոցով։