Համաշխարհային բանկը ներկայացրել է Հայաստանի, Ադրբեջանի և Վրաստանի տնտեսության աճի կանխատեսումը մինչև 2028 թվականը

Համաշխարհային բանկը բարձրացրել էՀայաստանի տնտեսության աճի կանխատեսումը 2026 թվականի համար։

Փորձագետներն այս տարի ակնկալում են Հայաստանի տնտեսության 5,6% , 2027 թվականին՝ 5,3%, իսկ 2028 թվականին՝ 5,1% աճ։

Թանկարժեք մետաղների վերաարտահանումից ստացվող ազդեցությունը, որը դիտվում էր ավելի վաղ, շարունակում է թուլանալ։ Կտրուկ կրճատվել է արտահանումը դեպի Արաբական Միացյալ Էմիրություններ, քանի որ ոսկու և թանկարժեք քարերի վերաարտահանման ծավալները նախորդ տարիներին նկատված աճից հետո վերադարձել են բնականոն մակարդակի։

Հայաստանում գյուղատնտեսության ակտիվությունը նվազել է անբարենպաստ եղանակային պայմանների և Ռուսաստանի կողմից հայկական սննդամթերքի ներմուծման սահմանափակումների խստացման պատճառով։ Ընդհանուր առմամբ, Հարավային Կովկասի տարածաշրջանում աճի հիմնական շարժիչ ուժը շարունակում է մնալ ծառայությունների ոլորտը, իսկ Հայաստանի տնտեսության զարգացմանը լրացուցիչ խթան է հաղորդել բնակարանային և ենթակառուցվածքային շինարարության ակտիվ աճը։

Ադրբեջանի համար 2026 թվականի կանխատեսումը, հակառակը, վատթարացվել է մինչև 1,2%՝ նավթային հատվածում շարունակվող կառուցվածքային անկման և, սպասվածից ավելի պասիվ, ոչ նավթային հատվածի զարգացման պատճառով՝ պետական կապիտալ ծախսերի կրճատման ֆոնին։ 2027 թվականին սպասվում է 1,8% աճ, իսկ 2028 թվականին՝ 1,9%։

Վրաստանը 2026 թվականին կպահպանի Հարավային Կովկասի երկրների շարքում տնտեսական աճի ամենաբարձր տեմպերը․ աճը կանխատեսվում է 7% մակարդակով՝ նախկին 5%-ի փոխարեն։ 2027 թվականին Համաշխարհային բանկը սպասում է Վրաստանի տնտեսության 5,5% , իսկ 2028 թվականին՝ 5% աճ։

Ընթացիկ տարում Հարավային Կովկասի երկրների տնտեսական աճի միջին տեմպը կկազմի 3,5%։