Փաշինյանը՝ Կարապետյանի, Ծառուկյանի և Քոչարյանի դատական գործընթացների մասին

Radio France Internationale-ին տված հարցազրույցում ՀՀ վարչապետ Նիկոլ Փաշինյանն անդրադարձել է Սամվել Կարապետյանի, Գագիկ Ծառուկյանի և Ռոբերտ Քոչարյանի՝ դատական գործընթացներում հայտնվելու հարցին։

Խոսելով Սամվել Կարապետյանի մասին՝ Փաշինյանը նշել է, որ նրա նկատմամբ քրեական գործ կա նաև Ֆրանսիայում՝ հարց բարձրացնելով, թե արդյոք դա նշանակում է, որ Ֆրանսիայի կառավարությունը քաղաքական հետապնդում է իրականացնում նրա նկատմամբ։

Անդրադառնալով Ռոբերտ Քոչարյանի գործին՝ վարչապետը հիշեցրել է, որ այն քննվում է վաղուց, այդ թվում՝ 2008 թվականի մարտի 1-ի իրադարձությունների շրջանակում։ Փաշինյանի խոսքով՝ վերջերս Մարդու իրավունքների եվրոպական դատարանի որոշում է ստացվել «Մարտի 1»-ի գործով, որտեղ, նրա մեկնաբանությամբ, սպանությունների պատասխանատվությունը վերագրվում է այդ ժամանակաշրջանում գործող պետական մարմիններին։

Փաշինյանը նաև հարց է բարձրացրել, թե ինչպես է Ռոբերտ Քոչարյանը, որը տասը տարի զբաղեցրել է նախագահի պաշտոնը, կարողացել կուտակել, իր գնահատմամբ, մի քանի հարյուր միլիոն դոլարի կարողություն։

«Արդեն ավելի քան 8 տարի ես Հայաստանի Հանրապետության վարչապետն եմ, ինչո՞ւ ես միլիոնատեր չեմ։ Որևէ մեկը կարո՞ղ է էդ հարցին պատասխանել։ Եվ ինչո՞ւ է Ռոբերտ Քոչարյանը միլիոնատեր»,- ասել է վարչապետը։

Անդրադառնալով Գագիկ Ծառուկյանի անունին՝ Փաշինյանը նշել է, որ 2018 թվականի հեղափոխության պատճառներից մեկը քաղաքացիների համոզմունքն էր, որ Ռոբերտ Քոչարյանի և Սերժ Սարգսյանի իշխանության տարիներին Հայաստանը թալանվել է՝ այդ գործընթացում նաև այլ անձանց մասնակցությամբ։

Վարչապետի խոսքով՝ նախկին բարձրաստիճան պաշտոնյաների կողմից, իր պնդմամբ, ապօրինի ձեռք բերված միջոցները պետք է վերադարձվեն պետությանը։ Նա ընդգծել է, որ ապօրինի գույքի բռնագանձման համակարգն արդեն գործում է, և այդ մեխանիզմով պետությանն ու համայնքներին վերադարձվում են նախկինում ապօրինի օտարված գույքեր։

Անդրադառնալով այն հարցին, թե արդյոք այդ անձանց նկատմամբ դատական գործընթացները քաղաքական որոշումների արդյունք են՝ Փաշինյանը նշել է, որ կոռուպցիայի դեմ պայքարի համար անհրաժեշտ են նաև քաղաքական պայմաններ և ինստիտուցիոնալ բարեփոխումներ։

Նրա խոսքով՝ Հակակոռուպցիոն կոմիտեի ստեղծումը տեղի է ունեցել եվրոպացի գործընկերների հետ համագործակցության արդյունքում, և այժմ այդ կառույցը պետք է ապահովի կոնկրետ արդյունքներ։

Փաշինյանը նաև նշել է, որ Ռոբերտ Քոչարյանի՝ «Մարտի 1»-ի գործով դատական գործընթացը դատարան է ուղարկվել դեռևս տարիներ առաջ, սակայն Հայաստանում դատական գործերի ձգձգման խնդիր կա։ Նրա պնդմամբ՝ որոշ անձինք կարողանում են օգտագործել նախկին կապերը՝ դատական համակարգում իրենց համար նպաստավոր իրավիճակներ ստեղծելու նպատակով։

Վարչապետը հավելել է, որ դատավորների սահմանադրական պաշտպանությունը և նախկին իշխանությունների ներկայացուցիչների հետ որոշ դատավորների ընտանեկան կապերը, իր գնահատմամբ, նույնպես ազդում են համակարգի աշխատանքի վրա։ Նա այս համատեքստում կրկին կարևորել է Հայաստանում նոր Սահմանադրության ընդունումը։