Ողբերգություն չկա, բուհը լիցենզիայով սահմանված տեղեր ունի․ ԳԹԿ փոխտնօրեն

Հանրապետության տարբեր բուհեր այս տարի դիմել է 14 հազար 332 անձ։ Բուհերում հատկացված տեղերի քանակը եղել է 16 038, որից անվճարը՝ 2 հազար 117, վճարովին՝ 13 հազար 921։ Այլ կերպ ասած՝ այս տարի դիմորդների թվից ավելի տեղեր են հատկացված եղել։ Համաձայն Գնահատման եւ թեստավորման կենտրոնի փոխտնօրեն Կարո Նասիբյանի, 1849 հոգի ընդունվել է անվճար, 7 հազար 569-ը՝ վճարովի հիմունքով։ Արդյունքում՝ այս տարի բուհական համակարգում թափուր է մնացել ավելի քան 6 հազար 300 վճարովի եւ 271 պետական պատվերով տեղ։
«Արձանագրենք, որ շրջանավարտների 72 տոկոսը դիմել է բուհ։ Կան բուհեր, որոնց քննությունները եւ մրցույթը ԳԹԿ-ն չի կազմակերպում, դրանք են Սլավոնական, Ֆրանսիական, Ամերիկյան համալսարանները, Լոմոնոսովի անվան համալսարանի մասնաճյուղը, Պլեխանովի անվան համալսարանի մասնաճյուղը եւ այլն։ Ստացվում է, որ բուհ դիմողների թիվը 72 տոկոսից ավելին է»,-նկատել է Կարո Նասիբյանը։

Չնայած այն բանին, որ թափուր մնացած տեղերի պատկերը մտահոգիչ էր գնահատել ԿԳՄՍ նախարար Ժաննա Անդրեասյանը՝ անընդունելի համարելով այն փաստը, որ տարիներ շարունակ արձանագրվում է թափուր տեղերի մեծ քանակ, ինչը նա բացատրել էր նրանով, որ տեղերի պլանավորումը եւ բաշխումն ի սկզբանե ճիշտ չեն արվում, ԳԹԿ փոխտնօրեն Կարո Նասիբյանի գնահատմամբ, այստեղ արտառոց ոչինչ չկա, քանի որ. «Ունեցել ենք տարիներ, երբ առաջարկվող տեղերի քանակն ավելին է եղել, քան շրջանավարտներինը, ոչ թե դիմորդներինը։ Եվ ասեմ, որեւէ ողբերգություն այստեղ չկա, բուհը լիցենզիայով սահմանված տեղեր ունի եւ դրանց համար հայտարարություն է տալիս։ Կգան, չեն գա՝ դա արդեն բուհի գործն է»։ Կարո Նասիբյանը մատնանշել է լրացուցիչ մրցույթին դիմելու հնարավորությունը, երբ դրական գնահատականներ ստացածները, որոնք հիմնական մրցույթից դուրս են մնացել, կարող են դիմել բուհերում եղած թափուր տեղերի համար եւ ընտրել մինչեւ 6 բուհ կամ նույնքան մասնագիտություն։
ԳԹԿ փոխտնօրենի դիտարկմամբ, այս տարի ամենաշատ մրցակցությունը եղել է Բժշկական համալսարանի «Ստոմատոլոգիա» բաժնում, որին հաջորդում է «Հանրային քաղաքականություն եւ կառավարում» բաժինը, այնուհետեւ՝ իրավագիտության։ «Մեզ համար անսպասելիորեն, ԵՊՀ-ի «Հասարակայնության հետ կապեր» բաժնում եւս եղել է բավական մրցակցություն՝ մեկ տեղի համար 2 դիմորդ։ Տարիներ շարունակ մեծ պահանջարկ ունեցող «Տնտեսագիտություն», «Ֆինանսներ» բաժիններն առաջին տասնյակում այս անգամ չկան»,- նշել է Կարո Նասիբյանը։
Ինչ վերաբերում է Ագրարային եւ Մանկավարժական համալսարաններին, ապա այս բուհերում տարեցտարի դիմորդների թիվը պակասում է․ «Ագրարային համալսարանը մարզի բուհից ավելի քիչ դիմորդ ունի»։

Ըստ Կարո Նասիբյանի՝ պատճառներից մեկն այն է, որ որոշ մասնագիտություններ շուկայում պահանջված չեն։
Թե՛ անցած տարի եւ թե՛ այս տարի դիմորդները հնարավորություն են ունեցել քննություն հանձնել մի քանի անգամ։ Արդյունքում՝ ընտրել են այն քննական գնահատականը, որի միավորն ավելի բարձր է եղել։ Ինչպես հայտնի է, անցյալ տարվանից Գնահատման եւ թեստավորման կենտրոնը կազմակերպում է 3 ընդունելության քննություն, առաջինը՝ հունվար-փետրվար ամիսներին, երկրորդը՝ հունիսին, եւ երրորդը՝ հուլիսին։ Հունվար-փետրվար ամիսներին դիմորդները նշում են առավելագույնը 2 առարկա եւ հանձնում քննություններ, հունիսին, բացի քննություններից, նշում են բուհը եւ մասնագիտությունը։ Նույնն անում են լրացուցիչ՝ երրորդ փուլում։

Թե ինչ հնարամտությունների են դիմել դիմորդները քննությունները բարձր ստանալու համար, Կարո Նասիբյանը նշեց, որ այս տարի նաեւ մետաղորսիչ սարքեր են տեղադրել, եւ այն դիմորդները, որոնց մոտ տեխնիկա է հայտնաբերվել, նրանց համար քննությունը դադարեցվել է։ Քննական ընթացքը մի շարք դեպքերում ուղեկցվել է զավեշտալի բացահայտումներով։ «Բջջային հեռախոսները կոշիկների մեջ են փորձել անցկացնել, շղթաներն են օգտագործել բջջայինի հետ կապուղիները թաքցնելու համար։ Մեկ այլ դեպքով էլ ականջի խորքային հատվածում փոքր գնդիկներ են տեղադրել, որոնք ծառայել են որպես ականջակալներ։ Որոշ դեպքերում այդ գնդիկները հանելու համար անհրաժեշտ է եղել բժիշկների միջամտությունը»,- նկատել է Կ․ Նասիբյանը։

Մի կողմից, դիմորդների պակաս եւ անգամ անվճար ուսման նկատմամբ հետաքրքրության բացակայություն, մյուս կողմից` նման խորամանկություններ՝ ընդունելության քննությունները հաղթահարելու համար: Ի դեպ, ԳԹԿ-ն երեկ արդեն հայտարարեց թափուր տեղերի համար լրացուցիչ մրցույթների մեկնարկը: Տեսնենք, թե ինչքանով այս մրցույթը կլրացնի բուհերի ընդունելության պակասը:

Այս թեմայով Թե ինչ վախեր ունի Փաշինյանը գերության մեջ գտնվող Ռուբեն Վարդանյանից, թերևս մենակ ինքը գիտի. Մանուկյան Ալեն Սիմոնյանը նոր օգնական ունի Ալեքսանդր Պետրակովը մեկ խնդիր ունի Ազգերի լիգայի նոր մրցափուլում` հաղթել Ֆրանսիան նոր վարչապետ ունի Արդարադատության նախարարը նոր տեղակալ ունի Ուկրաինան նոր ԱԳ նախարար ունի Երազանքս իրականցավ. խոսքն ուժ ունի, եւ այն, ինչ հավատով ուղարկում ես տիեզերք, իրականանում է. Անահիտ Հակոբյան Բարեկամավանի դպրոցն ունի մեկ առաջին դասարանցի, ավարտական՝ 12-րդ դասարանում աշակերտ չկա ՖԻԴԵ-ի աղյուսակում Հայաստանն ունի 6 ներկայացուցիչ «Ճանապարհային դեպարտամենտ» հիմնադրամը նոր տնօրեն ունի