Բիթքոյնների աղմկահարույց գողության մեջ մեղադրվողների մասին մանրամասներ են հայտնի դարձել

Ամուսիններ Իլյա Լիխտենշտեյնը և Հիզեր Մորգանը, որոնք ձերբակալվել էին Նյու Յորքում՝ 2016 թվականին Bitfinex հաքերային հարձակման ժամանակ գողացված կրիպտոարժույթը լվանալու դավադրության համար, ազատ են արձակվել 8 միլիոն դոլար գրավի դիմաց։ Daily Mail-ը որոշ մանրամասներ է հայտնել աղմկահարույց գործով մեղադրյալների մասին։

 

Նշվում է, որ 34-ամյա Իլյա Լիխտենշտեյնը և 31-ամյա Հիզեր Մորգանը Նյու Յորքի բնակիչներ են։ Դատական ​​փաստաթղթերում նշվում է, որ Լիխտենշտեյնն ունի Ռուսաստանի և Ամերիկայի քաղաքացիություն։

 

Մորգանը ռեփեր և ինֆլյուենսեր է, ով սյունակներ է գրել Forbes ամսագրի համար: Երգերից մեկում երգչուհին, ով հանդես է գալիս Razzlekhan անունով, իրեն անվանում է «Ուոլ Սթրիթից կոկորդիլոս»։

Հատկանշական է, որ 2020 թվականի հունվարին Forbes-ի համար իր հոդվածներից մեկում նա գրել էր բիզնեսը կիբերհանցագործներից պաշտպանելու մասին։

Լիխտենշտեյնը ներկայացված է որպես «օնլայն մարքեթինգային ընկերության համահիմնադիր»։

Yandex-ի նախկին թոփ մենեջեր Գրիգորի Բակունովն իր addmeto Telegram-ալիքում գրել է, որ մինչ կրիպտո փոխանակման հաքերային հարձակումը Իլյան զբաղվել է MixRank ստարտափով, որը նա լքել է 2016 թվականին։

«Այնուհետև նա երկու տարի չի աշխատել, ապա հանդես եկել որպես ներդրող: Եվ որպես ներդրող նա գրավել է Endpass նախագծի ուշադրությունը. նրանք պատրաստում էին շատ հեշտ օգտագործվող կրիպտո դրամապանակ: Իլյան դարձավ նրա խորհրդատուն և շարունակել է մնալ մինչ այժմ»,- հայտարարել է Բուկանովը։

Հիշեցնենք, որ հինգ տարի առաջ Bitfinex բորսայի վրա հաքերային հարձակման ժամանակ գողացվել է 120,000 բիթքոյն, որի գինը ներկայումս կազմում է 4,5 միլիարդ դոլար։

Ըստ քննիչների՝ Լիխտենշտեյնը և Մորգանը լվացել են գողացված միջոցները՝ օգտագործելով «կրիպտոարժույթով գործարքների լաբիրինթոս»: Գործողության ընթացքում իրավապահներին հաջողվել է առգրավել 3,6 միլիարդ դոլարի կրիպտոարժույթ։

Զույգը մեղադրվում է փողերի լվացման նպատակով դավադրության մեջ՝ առավելագույնը 20 տարվա ազատազրկումով, ինչպես նաև Միացյալ Նահանգներին խաբելու դավադրության մեջ (առավելագույն պատիժը հինգ տարի ազատազրկումն է):