Սանկտ Պետերբուրգում գտնվող կոյուղու խողովակում կիսամերկ տղամարդ է հայտնաբերվել (տեսանյութ)

21-ամյա երիտասարդը չի հիշում, թե ինչպես է կիսամերկ վիճակում մտել Պուլկովոյի կոյուղիները և ինչու է դա արել, հայտնում է KP.RU-ն։

ՌԴ Սանկտ Պետերբուրգում 2022 թվականի նոյեմբերի 9-ին «Պուլկովո» օդանավակայանի մոտակայքում գտնվող ավտոկայանատեղիում քանդել են ասֆալտը, որպեսզի 21-ամյա երիտասարդին հանեն կոյուղուց։ Պարզվել է, որ փրկվածը Սամարայի մարզի Ժիգուլևսկ քաղաքի բնակիչ է։

Երիտասարդի հարազատները պատմել են, որ նա անսպասելիորեն Սանկտ Պետերբուրգ է մեկնել 2022 թվականի նոյեմբերի 6-ին, իսկ մինչ այդ որոշ ժամանակ իրեն տարօրինակ էր պահում։ Նրա անհետացումից հետո ծնողները դիմել են ոստիկանություն և կամավորներին, որոնք սկսել են փնտրել երիտասարդին։

Ականատեսները պատմել են, որ օդանավակայանի մոտ նկատել են կասկածելի տղամարդու, ով մերկացել է ու մտել կոյուղու մեջ։ Որոշ ժամանակ անց անցորդները գետնի տակից լսել են մարդկային ճիչ։ Որոշվել է էքսկավատորով փոս փորել ու կտրել խողովակը, որի մեջ հայտնաբերվել է երիտասարդը՝ կիսամերկ վիճակում։ 

Ամենայն հավանականությամբ, երիտասարդը նման արարքի է գնացել արգելված նյութերի ազդեցության տակ։ Նա պատմել է, որ օդանավակայանում սպասում էր ընկերոջը, հետո կորցրել է գիտակցությունը և վնասվածքներով ու կապտուկներով արթնացել է հիվանդանոցում։ Այն ամենը, ինչ տեղի է ունեցել, ջնջվել է իր հիշողությունից։

Ծնողները արդեն գնում են Սանկտ Պետերբուրգ՝ որդուն տուն տանելու։ Իրավապահ մարմինները կհետաքննեն միջադեպի պատճառներն ու հանգամանքները։