Նախարարը վարչապետին լա՞վ չէր հասկացել
ՎերլուծականՎարչապետ Նիկոլ Փաշինյանը յուրաքանչյուր պատեհ պահի կոչ է անում գալիք խորհրդարանական ընտրություններում ամեն կերպ բացառել վարչական ռեսուրսի կիրառումը: Ըստ էության, Փաշինյանի այս կոչն առաջին հերթին ուղղված է իշխանության ղեկը ստանձնած իր թիմակիցներին, սակայն հենց վարչապետի թիմակիցներն են, որ մեկը մյուսին հերթ չզիջելով՝ «արջի ծառայություններ» են մատուցում նրան:
Հերթական դեպքն էլ արձանագրվել է Տրանսպորտի և կապի նախարար Հակոբ Արշակյանի հետ: Նախարարը ֆեյսբուքյան իր էջով տարածել է մի հարցաթերթիկ, որը ոչ այլ ինչ է, քան վարչական ռեսուրսի կիրառում: Հարցաթերթիկում հարց է տրվում, թե ինչպիսի՞ աջակցություն կարող են ցուցաբերել իր կողմանակիցները նախարար Հակոբ Արշակյանին, որը, ինչպես գիտենք, արտահերթ խորհրդարանական ընտրություններում ներկայացված է «Իմ Քայլը» դաշինքի նախընտրական ցուցակում: Ընդ որում. հացաթերթիկում նշել են նաև աջակցության հնարավոր տարբերակները: Եթե ցանկացողները չկարողանան ֆինանսական օժանդակություն ցուցաբերել նախարարի՝ պատգամավոր դառնալու բաղձալի երազանքի իրականացմանը, այդ դեպքում գուցե ընդունելի լինի քարոզչությանը մասնակցելու տարբերակը: Ինչպես ասում են՝ ով ինչով կարող է…
Հետաքրքիր է՝ եթե իշխանություններն այդքան վստահ են իրենց հաջողությանը՝ ինչո՞ւ են շարունակում իներցիայով շարժվել նախկինների՝ այդքան քննադատվող մարտավարությամբ…
Ս.Խաչատրյան