Նիկոլ Փաշինյանի հրահանգների «շնորհիվ» Գագիկ Ծառուկյանը դարձավ միջազգային քաղաքական պերսոն

Վերջին օրերին Հայաստանում տեղի են ունենում ներքաղաքական ակտիվ զարգացումներ, որոնք մեծ ուշադրությամբ և մանրամասնությամբ լուսաբանվում են և՛ Հայաստանում, և՛ պետության սահմաններից դուրս: «Բարգավաճ Հայաստան» կուսակցության առաջնորդ Գագիկ Ծառուկյանի առնչությամբ Ազգային անվտանգության ծառայության տարածած հայտարարությունը, դրան նախորդած ԲՀԿ Քաղաքական խորհրդի նիստի ընթացքում կուսակցության ղեկավարի՝ իշխանություններին ուղղված ծանր քննադատությունը և այնուհետև Ծառուկյանի առանձնատանը անցկացված լայնածավալ խուզարկությունից հետո հանրության ուշադրության կենտրոնում հայտնվեց իշխանության և ընդդիմադիր ուժի հեռակա փոխհրաձգությունը: Արդեն մի քանի օր շարունակվող իրադարձություններին հետևում են նաև միջազգային լրատվական հարթակներում: 

Ռուսական մեդիա դաշտ 

Հաշվի առնելով այն հանգամանքը, որ Գագիկ Ծառուկյանը բազմաթիվ կապեր ունի նաև Հայաստանից դուրս՝ նրա հետ կապված նորությունները չէին կարող վրիպել ռուսական առաջատար լրատվամիջոցների ուշադրությունից: «Премьеру Армении бросила вызов улица», ««Царукян — премьер»: Армения требует отставки Пашиняна», «Олигарх "оставил" Пашиняну на правление всего три месяца»,- գրում են ռուսական լրատվամիջոցները: ««Բարգավաճ Հայաստան» խմբակցության պատգամավորների էմոցիոնալ ելույթները, կոչերը՝ չմոռանալու, թե որքան կարևոր գործեր է արել Ծառուկյանը Հայաստանի համար՝ թեկուզ աշխատատեղերի ստեղծման հարցում, մեծամասնության տրամադրվածության վրա չազդեցին. նա զրկվեց պատգամավորական անձեռնմխելիությունից»,-կարդում ենք «Независимая газета»-ում: 

Մանրամասն լուսաբանելով իշխանություն-ընդդիմություն հակամարտությունը՝ «Газета.ru»-ն նշում է, որ Գագիկ Ծառուկյանի քաղաքական թիմը խորհրդարանում պահանջում է Նիկոլ Փաշինյանի հրաժարականը: 

Ռուսական մեկ այլ լրատվական՝ «Известия»-ն նշում է, որ «Գագիկ Ծառուկյանի աջակիցները ԱԱԾ շենքի մոտ, ուր քաղաքական գործիչը ժամանել էր հարցաքննության համար, ցույց են իրականացրել»: 

Օրերի ընթացքում խորհրդարանի մոտակայքից բաժիններ բերման ենթարկված հարյուրավոր քաղաքացիների մասին գրել էր նաև «Лента.ru»-ն:

Թեմային անդրադարձել էր նաև հայտնի վերլուծաբան Վլադիմիր Սոլովյովը: Նրա «Соловьёв LIVE» ծրագրին հյուրընկալվել էր Ազգային ժողովի փոխնախագահ Վահե Էնֆիաջյանը: 

Արևմտյան լրատվամիջոցներ 

Գագիկ Ծառուկյանի շուրջ կատարվող իրադարձություններին հետևում է նաև արևմտյան մամուլը: Թեմային անդրադարձել են հեղինակավոր լրատվամիջոցները:  Միջազգային «Associated Press» լրատվական գործակալությունը դեռևս հունիսի 14-ին հայտնել էր, որ ավելի քան 90 քաղաքացի բերման է ենթարկվել: Ամերիկյան «The Washington Post»-ն էլ, հղում անելով «Associated Press»-ին, մանրամասներ է ներկայացրել Գագիկ Ծառուկյանին առնչվող մեղադրանքների վերաբերյալ: 

Հեղինակավոր «Reuters» գործակալությունը, որին էլ հղում է կատարել նաև առաջատարներից «The New York Times»-ը, ներկայացնելով Գագիկ Ծառուկյանի դիրքորոշումը և հայտնելով Ծառուկյանին ազատությունից զրկելու խորհրդարանի որոշման մասին, նշում է, որ Հայաստանը երեքշաբթի օրվա դրությամբ արձանագրել է 17.489 կորոնավիրուսի դեպք և 293 մահ և Հարավային Կովկասի ամենատուժած պետությունն է: 

Անգլալեզու հայկական հարթակներից մեկն էլ` «EVN Report»-ը, հետաքրքիր «հնարավորինս օբյեկտիվ» հրապարակում է կատարել, որտեղ տեղ են գտել բազմաթիվ մեղադրանքներ և «հեղափոխական» ոճով ձևավորված արտահայտություններ: 

Թեմային անդրադարձել է նաև «Euronews» միջազգային լրատվական գործակալության թուրքական բաժինը: Ներկայացված են Ազգային անվտանգության ծառայության կողմից ներկայացված մի շարք մեղադրանքներ, ինչպես նաև ներառված են մի քանի փորձագետների հայտնած կարծիքները: 

USnews-ը գրում է, որ խորհրդարանական մեծամասնություն կազմող վարչապետ Փաշինյանի կուսակցության անդամները միաձայն քվեարկել են Ծառուկյանի անձեռնմխելիության վերացման, այնուհետ՝ նրա ձերբակալության համար: 

Գագիկ Ծառուկյանի շուրջ ստեղծված իրավիճակին հանգամանալից անդրադարձել է The Daily Star-ը՝ հղում անելով Agence France-Presse-ին: Պարբերականը հիշեցնում է՝ Ծառուկյանը անձեռնմխելիություն ունի` որպես խորհրդարանական: «Ընդդիմադիր առաջնորդի հարյուրավոր աջակիցներ հավաքվել էին ԱԱԾ շենքի մոտ և վանկարկում՝ «Փաշինյան, հեռացի՛ր»… Կիրակի Ծառուկյանը լրագրողներին ասել է, որ իր դեմ առաջադրված մեղադրանքները «քաղաքական» դրդապատճառներ ունեն և նպատակն է լռեցնել իրեն այն բանից հետո, երբ ինքը քննադատել է վարչապետ Նիկոլ Փաշինյանին կորոնավիրուսի դեմ պայքարը ձախողելու համար»,-գրում է պարբերականը և հավելում, որ ՀՀ կառավարությունը խիստ քննադատության է ենթարկվել այն բանի համար, որ շատ դանդաղ է արձագանքել համավարակին: 

«Լուկաշենկոյի ընկերը զանգվածային ցույցեր է կազմակերպել Հայաստանում» խորագրով հայաստանյան իրադարձություններին է անդրադարձել Belaruspartisan-ը: Պարբերականը հիշեցնում է, որ Գագիկ Ծառուկյանը Բելառուսի նախագահ Ալեքսանդր Լուկաշենկոյի ընկերն է: 

DW-ն նույնպես անդրադարձել է խորհրդարանում ծավալվող իրադարձություններին։ Հոդվածում նշվում է, որ ավելի վաղ ոստիկանությունը կասեցրել է ԱԺ շենքի դիմացից Գագիկ Ծառուկյանի աջակիցների՝ հավաք անցկացնելու փորձերը: Խոսելով իրենց գործողությունների դրդապատճառների մասին՝ իրավապահ մարմիններն անդրադարձել են արտակարգ դրության պայմաններում զանգվածային ցույցերի արգելքին, որոնք պարտադրված են կորոնավիրուսային համաճարակի իրավիճակով: 

Sputnik Georgia-ն հրապարակել է լուսանկարները, որտեղ երևում է, թե ինչպես «Մուլտի գրուպ» տարբերանշանով բեռնատար մեքենաները փակել են Աճառյանը Մյասնիկյանին կապող ճանապարհահատվածը։ 

Ինչպես տեսնում ենք, թեև միջազգային մամուլի արձագանքում կարելի է հանդիպել ձևակերպումների, որոնցում Գագիկ Ծառուկյանը ներկայացվում է իբրև խոշոր գործարար, սակայն կարմիր թելի պես բոլոր վերը նշված անդրադարձներում ակնհայտորեն անցնում է այն փաստը, որ Նիկոլ Փաշինյանի վերջին քայլերի «շնորհիվ» Գագիկ Ծառուկյանը միջազգային հարթակում խոշոր գործարար լինելուց զատ, այժմ նաև  քաղաքական ֆիգուր է: Փաստացի, այդ քայլերով Նիկոլ Փաշինյանը Գագիկ Ծառուկյանին դարձրեց միջազգային մասշտաբի քաղաքական պերսոն՝ մեկ օրում վերջինիս համար անելով այն, ինչը քաղաքական գործիչը իրականում կերազեր անել իր ողջ քաղաքական կարիերայի ընթացքում… 

Այս թեմայով Աստվածաշունչն ասում է՝ «ամեն իշխանությունն Աստծուց է»․ Փաշինյան (տեսանյութ) Զինվորն ի՞նչ գործ ունի սահմանին կանգնած․ Փաշինյան (տեսանյութ) Լեգիտիմությունն ավելի լավ երաշխավոր է, քան լավ երաշխավորը. Նիկոլ Փաշինյան (տեսանյութ) Ի՞նչ գործընթաց է սպասվում մոտակա օրերին Կիրանցում. Փաշինյանը մանրամասներ է ներկայացրել (տեսանյութ) Եթե Կիրանցի դպրոցն ադրբեջանցիների համար երևալը խնդիր է, կարող ենք ծառ տնկել, պատ կառուցել․ Փաշինյան (տեսանյութ) Կարող է մեր ինքնիշխան տարածքից դիրք դուրս գալ, որովհետև ՊՆ-ն այդ գծի վրա այլևս ծառայություն չի իրականացնելու. Փաշինյան (տեսանյութ) Որո՞նք են երաշխիքները, որ 4 գյուղերն ստանալուց հետո Ադրբեջանը նոր պահանջներ չի ներկայացնի. հարց՝ Փաշինյանին (տեսանյութ) Փաշինյանը ներկայացրել է՝ ինչ փուլերով են անցկացվելու սահմանազատման գործընթացի քայլերը (տեսանյութ) Կադաստրի կոմիտեն այդ փաստաթղթերը գաղտնիության սկզբունքով տրամադրել է ՊՆ-ին. Փաշինյան (տեսանյութ) Առաջիկա տարիները մեր պետության համար վճռորոշ նշանակություն ունեն․ Փաշինյան (տեսանյութ)