ՀԱՊԿ-ը չդավաճանեց իր մշտական գործելակերպին․ Արման Բաբաջանյան

Անկախ պատգամավոր Արման Բաբաջանյանն իր ֆեյսբուքյան էջում գրել է․ 

«Նախօրեին Տավուշում Ադրբեջանի սանձազերծած հերթական ռազմական ագրեսիան, սահմանագծից բացի, արտահայտվեց նաև քաղաքական, աշխարհաքաղաքական ասպարեզում։ Հայաստանի տարածքի նկատմամբ Ադրբեջանի իրականացրած ոտնձգությունից հետո ծագած առաջին հարցն այն էր, թե արդյոք Հավաքական անվտանգության պայմանագրի կազմակերպությունը՝ ՀԱՊԿ-ը, գոնե այս անգամ համարժեք քայլեր կանի՞ և կդատապարտի՞ Ադրբեջանի գործողությունները։

Երեկ օրվա սկզբին թվում էր, թե վերջապես ՀԱՊԿ-ում որոշել են կատարել իրենց կանոնադրական պարտավորությունները. առավոտյան ՀԱՊԿ գլխավոր քարտուղար Ստանիսլավ Զասը հայտարարեց, որ հրավիրում է ՀԱՊԿ-ի մշտական խորհրդի արտահերթ նիստ։ Դրանից ժամեր անց, սակայն, հրապարակվեց տեղեկատվություն, որ այդ նիստը անորոշ ժամանակով հետաձգվում է։

Այդպիսով, ՀԱՊԿ-ը չդավաճանեց իր մշտական գործելակերպին, այսինքն՝ դավաճանելով իր անդամ Հայաստանին՝ հերթական անգամ չդավաճանեց Ադրբեջանին, որն, ինչպես երևում է, ՀԱՊԿ-ի վրա ունի շատ ավելի մեծ ազդեցություն, քան դրա անդամ Հայաստանը ու այդ կառույցում մեր միակ դաշնակից Ռուսաստանը։ Վերջինիս արտգործնախարարությունը, ի դեպ, ՀԱՊԿ մշտական խորհրդի արտահերթ նիստի հետաձգումից կարճ ժամանակ անց հանդես եկավ հայտարարությամբ, որում Տավուշում տեղի ունեցածի համար կողմերի միջև հավասարության նշան դրեց՝ երկու կողմերին էլ զսպվածության միևնույն կոչը հղելով։

Այդպիսով, ՀԱՊԿ-ը կա՛մ Ռուսաստանի, կա՛մ Ադրբեջանի, կա՛մ երկուսի միասնական ճնշման ներքո հերթական անգամ չկատարեց Հայաստանի նկատմամբ իր պայմանագրային պարտավորությունները։ Իսկ արդեն այսօր ՀԱՊԿ-ը հանդես եկավ երկու կողմերի միջև հավասարության նշան դնող հայտարարությամբ՝ կրկնելով ՌԴ արտգործնախարարության երեկվա հայտարարությունը։

Այսինքն՝ ՀԱՊԿ-ն անգամ Ադրբեջանին դատապարտող հայտարարություն չտարածեց, ինչը ևս մեկ անգամ վկայում է այդ կառույցի չգոյության, իր կանոնադրական պարտավորությունների չկատարման մասին։ Բայց որևէ մեկը ՀԱՊԿ-ից ավելին չէր էլ սպասում։ Այդ կառույցը վաղուց է ցույց տվել, որ որպես ռազմաքաղաքական դաշինք՝ գոյություն չունի և վերածվել է աշխարհաքաղաքական առևտրի էժանագին հարթակի, որի միջոցով դրա անդամ, իսկ ավելի հաճախ՝ ոչ անդամ երկրները լուծում են իրենց խնդիրները։ Բայց դա պետք է մտահոգի ոչ միայն ու ոչ այնքան Հայաստանին, որքան այդ կառույցի դոմինանտ անդամ համարվող Ռուսաստանին, քանի որ ՀԱՊԿ-ը փաստացի վերածվել է թուրքական շահերի առաջմղման ձևաչափի. իր երեկվա լռությամբ ու անգործությամբ ՀԱՊԿ-ը կատարեց նույն գործառույթը, ինչ Թուրքիան՝ Ադրբեջանին սատարող իր խայտառակ հայտարարությամբ։ ՀԱՊԿ-ի այս հերթական անդեմությունը մեզ համար առիթ պետք է դառնա՝ մտածելու, քննարկելու համար այդ կառույցին մեր անդամակցության նպատակահարմարությունն ընդհանրապես։
Սահմանագծին կրած ռազմական պարտությունից հետո Ադրբեջանի դիվանագիտական հաջողությունները շարունակվեցին ոչ միայն ՀԱՊԿ-ում։

Երեկ Վրաստանի, Ուկրաինայի, Ադրբեջանի և Մոլդովայի մասնակցությամբ հիմնադրված դաշինքը՝ ՎՈՒԱՄ-ը, հանդես եկավ ամբողջությամբ միակողմանի հայտարարությամբ՝ Տավուշում տեղի ունեցածի համար մեղադրելով Հայաստանին։ Սա ևս մեզ պետք է մտածելու ու մեր դիվանագիտական ջանքերն ավելացնելու առիթ դառնա, քանի որ այդ կազմակերպությունում, բացի Ադրբեջանից, մյուս պետությունների հետ ունենք կամ բարեկամական, կամ առնվազն նորմալ հարաբերություններ, որոնք, սակայն, նշանակություն չեն ունեցել նման հայտարարությունը կանխելու գործում։

Հայաստանի անվտանգության գլխավոր երաշխավորը՝ հայկական բանակը, ինչպես միշտ, իր բարձրության վրա է և պատվով է կատարում իր առջև դրված խնդիրները։ Բայց մենք իրավունք չունենք մեր զինված ուժերին թողնելու միայնակ ու առանց թիկունքային ապահովվածության։ Իսկ դա նշանակում է, որ մենք պետք է լուրջ վերատեսության ենթարկենք մեր արտաքին քաղաքականությունը, բազմապատկենք մեր ջանքերը դիվանագիտական ճակատում՝ թույլ չտալու համար, որպեսզի ռազմի դաշտում մեր զինվորների արձանագրած սխրանքները փոշիանան աշխարհաքաղաքական խաղերի հորձանուտում»։

Այս թեմայով Դերասան Արման Նավասարդյանը Կիրանցում է (տեսանյութ) Այստեղ է՞լ է ՀԱՊԿ-ը մեղավոր. Զախարովա «Մարտական եղբայրություն» միաբանության 6 անդամներ ազատ են արձակվել, Արման Պետրոսյանը կալանավորվել է Մենք պետք է պատրաստվենք միասնական պայքարի` հանուն Հայրենիքի փրկության և հզորացման. «Միասնություն» համազգային շարժում Տիգրան Աբրահամյանը, Մհեր Սահակյանն ու Արման Ղազարյանը ՁՊՎ-ում տեսակցել են Սուրեն Պետրոսյանին Եթե Հայաստանը որոշի դուրս գալ ՀԱՊԿ-ից, հարց է՝ ինչպես է նրա ներկայիս ղեկավարությունը գնահատում երկրի առջև ծառացած սպառնալիքները. Թասմաղամբետով Տարածաշրջանում կայունությունը մեծապես կախված է Հայաստանի և Ադրբեջանի խաղաղության պայմանագրի ստորագրման հեռանկարներից. ՀԱՊԿ գլխավոր քարտուղար Հայաստանի գործունեությունը կազմակերպությունում շարունակվում է. ՀԱՊԿ գլխավոր քարտուղար Դեռ ժամանակ կա, շատ բան կարող է փոխվել. ՀԱՊԿ գլխավոր քարտուղարը՝ գագաթնաժողովին Փաշինյանի մասնակցության մասին ՀՀ կառավարությունը գյուղերի բնակիչներին կանգնեցնում է լուրջ խնդիրների առաջ․ Արման Թաթոյան