Բաքուն բողոքի նոտա է հղել Արցախի հարցով ԱՄՆ-ի պետքարտուղարի խոսքերի կապակցությամբ
Արտաքին ՔաղաքականԱդրբեջանի ԱԳ նախարարության մամուլի ծառայությունը հաղորդագրություն է տարածել, որում ասված է․ «Ադրբեջանական կողմը գտնում է, որ ԱՄՆ պետքարտուղարի կարծիքը չի համապատասխանում հակամարտության կապակցությամբ նախկինում արված ԱՄՆ-ի կառավարության բազմաթիվ հայտարարություններին։ Այդ կարծիքը նաև չի համապատասխանում ԱՄՆ-ի կարգավիճակին` որպես ԵԱՀԿ Մինսկի խմբում համանախագահող երկիր»,- հայտարարել է պաշտոնական Բաքուն։
Հիշեցնենք, որ ավելի վաղ Մայք Պոմպեոն հարցազրույցի ընթացքում հույս էր հայտնել, որ հայերը կկարողանան պաշտպանվել ադրբեջանցիների գործողություններից:
«Դա վտանգավոր է: Մենք այժմ ունենք Թուրքիա, որը միջամտել է և ռեսուրսներ տրամադրել Ադրբեջանին` մեծացնելով ռիսկը, մեծացնելով կրակային հզորությունը, որն առկա է պատմական հակամարտությունում: Լեռնային Ղարաբաղ կոչվող փոքրիկ վայր` մոտ 150 հազար բնակչությամբ»,- նշել էր Պոմպեոն:
Պետքարտուղարը հավելել էր, որ այդ հակամարտությունը երկար տարիների պատմություն ունի, որի լուծումը պետք է տեղի ունենա բանակցությունների ու խաղաղ քննարկումների միջոցով: