Ռուբեն Հայրապետյանը հարցեր է ուղղել Կառավարությանը՝ ՀՊՏՀ ռեկտորի ընտրության արդյունքների հարցի վերաբերյալ

Հայաստանի պետական տնտեսագիտական համալսարանի ռեկտորի նախկին պաշտոնակատար Ռուբեն Հայրապետյանը Ֆեյսբուքի իր էջում Կառավարությանը մի քանի հարցեր է ուղղել։

Նա, մասնավորապես գրել է․

«Հարգելի՛ Կառավարություն, քանի որ այս խառն իրավիճակում ՀՊՏՀ ռեկտորի ընտրության արդյունքները հաստատելու մասին հարցն անհայտ պատճառներով Կառավարության նիստի մեկնարկից ընդամենը 15 րոպե առաջ փաստացի թաքուն ընդգրկվեց օրակարգում, այնուհետեւ հանվեց օրակարգից՝ իրավական խնդիրները եւ դրանց առնչվող դատական հայցերը հավելյալ քննարկելու նպատակով, եւ  հաշվի առնելով, որ, ըստ գործող օրենքի, ՀՀ կառավարությունն իրավասու է ինչպես հաստատելու, այնպես էլ անվավեր ճանաչելու ընտրության արդյունքները, խնդրում եմ քննարկման ընթացքում պարզել եւ ներկայացնել հետեւյալ կարեւոր հարցերի պատասխանները՝

1. Ի՞նչ պայմաններում եւ ո՞ւմ նախաձեռնությամբ էր դատական հայցերով եւ փաստացի անօրինականության մասին դատարանի որոշումներով ծանրաբեռնված հարցն ընդգրկվել Կառավարության նիստի օրակարգում՝ որպես չզեկուցվող հարց, այն դեպքում, երբ ՀՀ պատմության մեջ չի եղել գեթ մեկ դեպք, որ ռեկտորի ընտրության արդյունքները հաստատվեն առանց զեկուցելու, այդ թվում՝ ընդամենը 1 շաբաթ առաջ ՃՇՀԱՀ ռեկտորի ընտրության արդյունքները հաստատելու մասին համանման հարցը, որը նույնպես զեկուցվեց:

2. Ի՞նչ պայմաններում եւ ո՞ւմ նախաձեռնությամբ էր այդ աննախադեպ եղանակով չզեկուցվող հարցը, ի տարբերություն Կառավարության նիստի մնացած հարցերի, նիստի օրակարգում ներառվել հրատապ ռեժիմով՝ մեկնարկից ընդամենը րոպեներ առաջ՝ այն դեպքում, երբ 5 ամիս շարունակ ձգվող հարցը կարող էր սովորական ռեժիմով ներառվել Կառավարության հաջորդ նիստի օրակարգում:

3. Ինչո՞ւ եւ ինչպե՞ս է ՀՀ կառավարությունը անվավեր ճանաչելու փոխարեն, հաստատելու մի գործընթացի արդյունք՝ նախապես տեղեկացած լինելով, որ ՀՀ վերաքննիչ դատարանը 2 առանձին եւ գործող որոշումներով (ԵԴ/19554/02/20 եւ ԵԴ/19625/02/20) բառացի արձանագրել է, որ այդ գործընթացը տեղի է ունեցել օրենքի խախտման հետեւանքով, եւ եթե չլինեին օրենքի խախտումները, այդ ընտրությունը պարզապես չէր լինելու:

4. Ինչո՞ւ եւ ինչպե՞ս է ՀՀ կառավարությունը հաստատելու ռեկտորի ընտրության արդյունքները` նախապես տեղեկացած լինելով, որ խորհրդի նախագահը, որն ըստ օրենքի «հրավիրում է խորհրդի նիստը եւ ապահովում խորհրդի անդամների մասնակցությունը», պաշտոնապես հայտարարել է, որ ֆիզիկապես չի կարողացել օրենքով սահմանված կարգով ծանուցել նիստի մասին եւ ապահովել խորհրդի բոլոր անդամների մասնակցությունը, որովհետեւ արգելանքը հանելու մասին որոշումն ստացել է նիստից 5 րոպե առաջ: Իսկ խորհրդի որոշ անդամներ, որոնք բացակայել են, նույնիսկ պաշտոնապես հայտնել են, որ հնարավորություն չեն ունեցել ռեկտորի ընտրության նիստին մասնակցելու, որովհետեւ չեն ծանուցվել նիստի մասին՝ նամակագրությամբ փաստելով, որ որպես խորհրդի անդամ ստացած իրենց վերջին ծանուցումը եղել է մրցույթի նախորդ օրը՝ այն մասին, որ մրցույթի արգելանքը ուժի մեջ է: Դրանից հետո կապի որեւէ միջոցով չի ուղարկվել ծանուցում, որ արգելանքը հանվել է, եւ խորհրդի անդամները հրավիրվում են նիստի։

5. Ո՞ր դեպքերի համար է օրենսդիրը Կառավարությանն օժտել ընտրության արդյունքներն անվավեր ճանաչելու իրավունքով, եթե ոչ այն դեպքի, երբ առկա են վերոնշյալ անհերքելի փաստերը, իսկ Կառավարությունը նախապես տեղեկացած է դրանց մասին եւ գիտակցում է, որ արդյունքները հաստատելու եւ ռեկտորի փաստացի պաշտոնավարելու դեպքում կարճ ժամանակ անց դատարանի հաջորդ որոշմամբ առաջանալու է այդ ժամանակահատվածում առոչինչ պայմանագրերի եւ մի քանի 100 միլիոն դրամ գումարի հատուցման խնդիր»։

Հիշեցնենք, որ դեռեւս 2020թ․-ի հուլիսի 17-ին Դիանա Գալոյանն ընտրվել էր ՀՊՏՀ-ի ռեկտորի պաշտոնում, սակայն համալսարանի խորհրդի որոշ անդամներ բարձրաձայնել էին,  որ ռեկտորի մրցույթը առոչինչ է, որովհետեւ խորհրդի անդամները չեն հրավիրվել նիստի: Այդ նույն օրը Բարձարգույն որակավորման հանձնաժողովի նիստում որոշում էր կայացվել անվավեր է ճանաչել Դիանա Գալոյանի՝ միջազգային տնտեսագիտություն մասնագիտությամբ տնտեսագիտության դոկտորի գիտական աստիճան շնորհելու մասին որոշումը: Բացի այդ, ԲՈՀ այն ժամանակվա ղեկավար Սմբատ Գոգյանը Գալոյանին մեղադրում էր գրագողության մեջ։ Դիանա Գալոյանի ատենախոսության ուսումնասիրության համար ստեղծված մասնագիտական հանձնաժողովն արձանգրել էր, որ Դիանա Գալոյանի ատենախոսության մեջ առկա են առանց հեղինակների եւ աղբյուրների նշման փոխառություններ: Դիանա Գալոյանի ռեկտոր նշանակվելը կապվում էր նաեւ հովանավորչության փաստի հետ, քանի որ նա մտերիմ հարաբերություններ ուներ ԿԳՄՍ նախկին փոխնախարար Գրիշա Թամրազյանի հետ։

Թեեւ Դիանա Գալոյանը հուլիսի 17-ին էր ընտրվել ՀՊՏՀ ռեկտորի պաշտոնում, սակայն մինչ օրս Կառավարությունը չի հաստատել ռեկտորի մրցույթի արդյունքները։ Ուսումնական տարվա սկզբին՝ սեպտեմբերի 23-ին, բուհի ռեկտորատը տեղեկացրեց, որ ուսումնական գործընթացը դադարեցվել է եւ դասերը չեն վերսկսվի, քանի դեռ հուլիսի 17-ին ռեկտորի ընտրություններում հաղթած Դիանա Գալոյանը Կառավարության կողմից չի նշանակվել ռեկտորի պաշտոնում: Կառավարության դեկտեմբերի 17-ի նիստում ընդգրկված էր Դիանա Գալոյանին Հայաստանի պետական տնտեսագիտական համալսարանի ռեկտորի պաշտոնում նշանակելու մասին հարցը, սակայն մրցույթի արդունքների հաստատման հարցում դիտարկումներ հայտնեց Աշխատանքի եւ սոցիալական հարցերի նախարար Մեսրոպ Առաքելյանը՝ հիշեցնելով, որ դատարանի կողմից ՀՊՏՀ ռեկտորի ընտրության արգելք էր սահմանվել, հակադարձելով նրան, ԿԳՄՍ նախարար Վահրամ Դումանյանն ասաց, որ Դիանա Գալոյանին այդ պաշտոնում չհաստատելու որեւէ հիմք չկա։ Նիստը վարող փոխվարչապետ Տիգրան Ավինյանն ասաց, որ հարցի քննարկումը հետաձգվում է։

Այս թեմայով ՀՊՏՀ-ի ռեկտոր Դիանա Գալոյանը հրաժարական է տվել․ News.am ՀՊՏՀ-ի ռեկտոր Դիանա Գալոյանը հրաժարական կտա․ News.am ՀՊՏՀ-ի ռեկտորը ԱՄՆ-ում մեղադրվում է հագուստի խանութից գողություն անելու մեջ․ «Հրապարակ» Տնտեսագիտական համալսարանում, որտեղից տարհանել են ուսանողներին ու դասախոսներին, գազի արտահոսք չկա. համալսարան ՀՊՏՀ-ում տուժած ուսանող կամ դասախոս չկա, հոտի հետ կապված նմուշառումներ են արվել ՀՊՏՀ մասնաճյուղում ուսանողների ինքնազգացողությունը վատացել է․ շենքում զգացվել է տարօրինակ հոտ ՀՊՏՀ-ում պրոֆեսորի աշխատավարձը սեպտեմբերի 1-ից կկազմի 530.000 ՀՀ դրամ Գողությունն ու գրագողությունը 40 օր է տևում. Էդգար Ղազարյանը՝ ՀՊՏՀ ռեկտորի մասին Պատրաստ եմ անվճար դասախոսություններ կարդալ ՀՊՏՀ ուսանողների և մագիստրանտների համար․ Էդգար Ղազարյան Էդգար Ղազարյանին ՀՊՏՀ-ում դասախոսի աշխատանքից ազատել են. Aravot.am