Երկար ժամանակ լուր չունենալուց հետո Մելքոնյաններն իմացան Մարգարի զոհվելու մասին. հերոսն այդպես էլ չհասցրեց լեյտենանտի կոչում ստանալ

Մելքոնյանները երկար ժամանակ որևէ լուր չունենալով  և հույսով սպասելով՝ նոյեմբերի 5-ին իմացան, որ իրենց որդին՝ Մարգար Մելքոնյանը, հերոսաբար զոհվել է՝ հայրենիքի պաշտպանության համար մղվող մարտերում:

«Դեպքը տեղի է ունեցել  հոկտեմբերի 22-ին, բայց մեզ ո՛չ զինվորական կոմիսարիատից, ո՛չ զորամասից չեն տեղեկացրել, երկար ժամանակ տեղեկություն չունեինք, հետաքրքրվեցինք ու իմացանք ցավալին»,- ԼՈՒՐԵՐ.com-ի հետ զրույցում ասաց Մարգարի քույրը՝ Ամալյա Մելքոնյանը:

Մարգարը բանակ էր զորակոչվել 2020 թվականի հունվարին, սկզբնական շրջանում ծառայել է Լուսակերտի ուսումնական զորամասում, որից հետո տեղափոխել են Արցախ:

Ծառայում էր Մարտունի 2-ում, պատերազմի օրերին էլ հերոսական պայքարը մղել է հենց այնտեղ: Հրետանավոր, ապա հետախուզական ջոկի հրամանատար է եղել:

Մարգարը Երևանից էր, ունի մեկ քույր: Բնավորությամբ համբերատար ու հանգիստ հերոսը սովորել է  Երևանի թիվ 134 հիմնական դպրոցում: Դպրոցն ավարտելուց հետո ընդունվել էր Երևանի ինֆորմատիկայի պետական քոլեջ: Ապագա ծրագրավորող էր, սակայն ուսումը կիսատ թողնելով՝ մեկնել էր ծառայության:

Ընտանիքի անդամները Մարգարի ծառայակից ընկերների մասին տեղեկություն չունեն։

Քույրը հիշում է, թե բանակ գնալիս ինչ մեծ ոգևորությամբ էր լցված. «Իր համար պատիվ էր ծառայելը, բանակ գնալու օրն էլ այնքան ուրախ էր: Ծառայությունից հետո Մարգարի նպատակները կապված էին մասնագիտության հետ, հայտնի ու լավ ծրագրավորող էր ուզում դառնալ: Ծրագրավորման վերաբերյալ ամեն ինչ հետաքրքրում էր իրեն, բազմաթիվ գրքեր էր ընթերցում»:

Համառ, ընկերասեր ու գաղտնապահ. բոլորը Մարգարին հենց այսպիսին գիտեին: Սիրում էր ամեն ինչ իր ուզածով անել, նպատակասլաց էր:

Հարազատները Մարգարի հետ վերջին անգամ խոսել են զոհվելուց մեկ օր առաջ՝ հոկտեմբերի 21-ին:

Քրոջ խոսքով՝ պատերազմի ընթացքում Մարգարին առաջարկել են լեյտենանտի կոչում, առաջարակն ընդունեց, սակայն այդպես էլ չհասցրեց ստանալ...

Արփինե Հակոբյան

Այս թեմայով Ղրղզստանի նախագահն ու Ալիևը կայցելեն օկուպացված Արցախ «Զա՛րկ, երբ հալածում են քեզ». հրապարակում այրվեցին Թուրքիայի և Ադրբեջանի դրոշները (տեսանյութ) Հայատան-Ադրբեջան շփման գծի մի փոքր կտոր դարձավ բոլորի կողմից ճանաչված սահման. Իոանիսյան Հայաստան-Ադրբեջան պետական սահմանի Տավուշ-Ղազախ հատվածում տեղադրվել է առաջին սահմանային սյունը Էս քո համար ա հող, պարոն Փաշինյան, մեզ համար սրբազան հայրենիք ա. նոյեմբերյանցի (տեսանյութ) Հայաստան-Ադրբեջան շփման գծի որևէ փոփոխություն այսօր չի նախատեսվում. ՀՀ ԱԱԾ Վրաստանը ողջունում է Ադրբեջանի և Հայաստանի միջև ձեռք բերված պայմանավորվածությունը Տարածաշրջանում կայունությունը մեծապես կախված է Հայաստանի և Ադրբեջանի խաղաղության պայմանագրի ստորագրման հեռանկարներից. ՀԱՊԿ գլխավոր քարտուղար Քաղաքացիական պատերազմ են հրահրում․ արշավ Եկեղեցու և Կիրանցում ակցիայի մասնակիցների դեմ Հասանովը հանդիպում է անցկացրել, հանձնարարականներ տվել սահմանազատման գործընթացի իրականացման վերաբերյալ