ՄԱԿ-ը նախազգուշացրել է Եմենին սպառնացող աննախադեպ սովի մասին

Եմենում շարունակվող զինված հակամարտությունն սպառնում է դառնալ արդի աշխարհում իր ծավալներով խոշորագույն սովի պատճառ: Այդ մասին հայտարարել է ՄԱԿ-ի արտակարգ օգնության համակարգող Սթիվեն Օ՛Բրայենը, տեղեկացնում է BBC-ն:

Ելույթ ունենալով Անվտանգության խորհրդի նիստում՝ նա ընդգծել է, որ Եմենի շուրջ 10 մլն բնակիչներ սննդամթերքի անբավարարություն ունեն, նրանցից շատերը հայտնվել են սովամահության եզրին: Դրա հետ մեկտեղ ՄԱԿ-ի ներկայացուցիչը հայտնել է, որ կարիքավորների թվում 2,2 մլն երեխաներ կան:

«Հումանիտար իրադրությունը Եմենում վատթարանում է: Դիտվում է զինված հակամարտության սաստկացում: Երկրում շարունակվում են ամենօրյա օդային ռմբակոծությունները եւ զինված բախումները: Վերջին շաբաթվա ընթացքում մենք հաղորդագրություններ ենք ստացել 365 միջադեպերի մասին»,-հայտնել է Օ՛Բրայենը:

2014 թվականի օգոստոսից ի վեր Եմենում չի դադարում դիմակայությունը Սաուդյան Արաբիայի կողմից աջակցվող երկրի իշխանությունների եւ շիա խռովարարների (հուսիների) միջեւ:

Սթիվեն Օ՛Բրայենի խոսքով՝ Եմենի հակամարտության հետեւանքով սպանվել է 7 հազար 469 մարդ: Եվս ավելի քան 40 հազար բնակիչներ վերքեր են ստացել:

ՄԱԿ-ը կողմերին հաշտության կոչ է անում, որպեսզի բնակչությանը հումանիտար օգնություն հասցվի: