Մի խումբ երիտասարդներ ծեծի են ենթարկել ամուսիններին ու նրանց դստերը․ հայրը կրակոցներով է կանգնեցրել հարձակումը

Սեպտեմբերի 17-ին՝ ժամը 18:40-ի սահմաններում, Երևանում՝ Անաստաս Միկոյան փողոցում՝ «Արև» սուպերմարկետի մոտ, մի խումբ անձանց միջև վիճաբանությունը վերածվել է ծեծկռտուքի, որի ընթացքում հնչել են կրակոցներ։

Ինչպես հայտնում է ֆոտոլրագրող Գագիկ Շամշյանը, ոստիկանության Նոր Նորքի բաժնի ծառայողները պարզել են, որ 19-ամյա Ջիվան Թ.-ն, 17-ամյա Արման Հ.-ն, 19-ամյա Հովիկ Հ.-ն, 25-ամյա Լևոն Ա.-ն, 16-ամյա Տիգրան Թ.-ն և 18-ամյա Ավետ Մ.-ն, ըստ նախնական տվյալների, անպարկեշտ վերաբերմունք են դրսևորել 37-ամյա կնոջ նկատմամբ, ինչից հետո վիճաբանություն է սկսվել նրա, 59-ամյա հոր և 60-ամյա մոր միջև։

Վիճաբանությունը վերածվել է ծեծկռտուքի․ ըստ աղբյուրի՝ նշված անձինք ծեծի են ենթարկել կնոջը, նրա հորն ու մորը, ինչի հետևանքով նրանք մարմնական վնասվածքներ են ստացել։

Դեպքի ընթացքում կնոջ հայրը, տեսնելով իրավիճակի սրումը, իր մոտ եղած գազային ատրճանակով երկու նախազգուշական կրակոց է արձակել օդ։ Դրանից հետո ծեծկռտուքի մասնակիցները դիմել են փախուստի։

Ոստիկանները հայտնաբերել են կնոջ հորը, նրան տեղափոխել Նոր Նորքի բաժին, որտեղ նրա մոտ հայտնաբերվել է ատրճանակը։ Հայտնաբերվել է նաև դեպքի վայրից հեռացած «BMW X7» մակնիշի ավտոմեքենան, որը տեղափոխվել է ոստիկանության պահպանվող հատուկ տարածք։

Դեպքի առթիվ «խուլիգանություն» հատկանիշներով կազմված փաստաթղթերը փոխանցվել են Քննչական կոմիտեի Ավան և Նոր Նորք վարչական շրջանների քննչական բաժին։ Ոստիկանությունն ու քննչական մարմինները միջոցներ են ձեռնարկում ծեծկռտուքի մասնակիցներին հայտնաբերելու և քննությանը ներկայացնելու ուղղությամբ։