Ովքեր որ իրենց մայր եկեղեցու դեմ դուրս կգան, թող դուրս գան․ Տավուշի թեմի առաջնորդ Տեր Սամվել վարդապետ

ՀՀ վարչապետ Նիկոլ Փաշինյանի կողմից Էջմիածնում կազմակերպվող հանրահավաքն ընդդեմ Ամենայն Հայոց Կաթողիկոսի դարձել է լարվածության նոր օջախ։ Այս առիթով Euromedia 24-ը զրուցեց Տավուշի թեմի առաջնորդ Տեր Սամվել վարդապետի հետ։ Հարցին՝ արդյո՞ք իր ճանաչած մարդիկ կմասնակցեն հանրահավաքին, Տեր Սամվել վարդապետը հստակ նշեց, որ իր ծանոթներից ոչ ոք չի պատրաստվում մասնակցել։ Ինչ վերաբերում է հարցին՝ հայ ժողովրդի որքա՞ն մասը կմասնակցի, նա դժվարացավ պատասխանել՝ նշելով, որ չի կարող կանխատեսել։ Տեր Սամվել վարդապետը նաև մտահոգություն հայտնեց Մայր Աթոռի վրա հնարավոր հարձակումների մասին՝ ընդգծելով, որ «ընդհանրապես մտահոգություններ ունենք»։ 

Ի պատասխան հարցի, թե Մայր Աթոռն ինչպիսի պատասխան գործողություններ պետք է ձեռնարկի, Տավուշի թեմի առաջնորդը շեշտեց, որ Մայր Աթոռը գտնվում է իր մշտական հոգևոր ընթացքի մեջ և շարունակում է իր ծառայությունը. «Մայր Աթոռն իր ծառայությամբ իր մշտական հոգևոր ընթացքի մեջ է, ովքեր որ իրենց մայր եկեղեցու դեմ դուրս կգան, թող դուրս գան»։

Հիշեցնենք, որ նախկինում Տավուշի թեմի առաջնորդն է եղել Գերաշնորհ Տեր Բագրատ արքեպիսկոպոս Գալստանյանը։ Հարցին՝ որպես Տավուշի թեմի ներկայիս առաջնորդ, արդյո՞ք կարծիք չի հայտնել Բագրատ Սրբազանի կալանավորման մասին, Տեր Սամվել վարդապետը պատասխանեց. «Ես արդեն հայտնել եմ, երբ ընդհանուր ժողովի պատասխանը եղավ»։ Երբ հարց ուղղեցինք, թե արդյո՞ք անձնապես է դատապարտում, նա պատասխանեց. «Անձնապես ասացի՝ ժողովի պատասխանով»։

Սա ենթադրում է, որ նա անձնապես սատարում է այն դիրքորոշումը, որն արտահայտվել է ընդհանուր ժողովի կողմից՝ հավանաբար դատապարտելով կալանավորումը։