Էստոնիայում ՌԴ քաղաքացուն դատապարտել են 6.5 տարվա ազատազրկման՝ Պրիգոժինի վերաբերյալ տվյալների փոխանցման համար

Էստոնիայի դատարանը 6.5 տարվա ազատազրկման է դատապարտել Ռուսաստանի քաղաքացի Պավել Կապուստինին՝ երկրի դեմ լրտեսության մեղադրանքով։ Ըստ ERR լրատվականի՝ Կապուստինը ռուսական հատուկ ծառայություններին է փոխանցել տվյալներ Էստոնիայում տեղի ունեցող իրադարձությունների, այդ թվում՝ Նարվայում տանկ-հուշարձանի ապամոնտաժման և Վագներ խմբի ղեկավար Եվգենի Պրիգոժինի ապստամբության ընթացքում տեղի բնակիչների տրամադրությունների մասին։

Բացի այդ, նա մեղադրվում է նաև պատժամիջոցների ենթակա ապրանքների տեղափոխման, ինչպես նաև կեղծ տվյալներով բալթյան հանրապետությունում կեցության թույլտվություն ստանալու մեջ։

Հիշեցնենք, որ բալթյան երկրները վերջին ամիսներին ակտիվացրել են վերահսկողությունը ռուսաստանյան քաղաքացիների նկատմամբ՝ հատկապես Ուկրաինայի պատերազմից հետո լրտեսության կասկածներով գործերի աճի ֆոնին։