Թուրք մտավորականները դատապարտել են Քեսաբում տեղի ունեցող գործողությունները. Demokrathaber.net

Համաշխարհային Մամուլ 26 Մարտ, 2014 10:54

Թուրք-սիրիական սահմանից մի քանի կիլոմետր հեռավորության վրա գտնվող հայաբնակ Քեսաբ բնակավայրի վրա տեղի ունեցող հարձակումները և Թուրիայի կողմից ահաբեկիչներին ցուցաբերվող աջակցությունը մեծ դժգոհություն են առաջացրել որոշ թուրք մտավորականների շրջանում:

Ինչպես հաղորդում է թուրքական Demokrathaber.net-ը, այս կապակցությամբ իրենց կարծիքն են հայտնել հայտնի թուրք հրատարակիչ ու գրող Ռագըփ Զարաքոլուն և հրապարակախոս-գրող Սաիթ Չեթինօղլուն:

«Քեսաբի յուրահատկությունը հայերով բնակեցված լինելն է: Այժմ Քեսաբը դափ-դատարկ է: Այնտեղ բնակվողները 1915 թվականից, ապա 1939 թվականից հետո կրկին հայտնվել են գաղթի ճանապարհին, պատսպարվել են Լաթաքիայում: Իսկ եթե ռմբակոծված սիրիական օդանավն այդ խմբերի' սահմանը հատելու և քաղաքացիական բնակչությանը պաշտպանելու նպատակո՞վ էր այնտեղ: Իսկ եթե այն կործանվեց այդ խմբավորումների մուտքն ավելի հեշտացնելու համա՞ր… Թուրքիայի Հանրապետությունն ասես իր վրա պարտավորվածություն վերցրած լինի հապշտապ փոխել Սիրիայի ներքին պատերազմի հետ կապված քաղաքականությունը»,- ասել է Զարաքոլուն:

Թուրք մյուս մտավորականը' Սաիթ Չեթինօղլուն, հայտնել է, որ Քեսաբում հայերի լքած տները թալանվում են: «Քեսաբում ընկերներ ունեմ: Մուսալեռցի պատմիչ Հակոբ Չոլաքյանը մնում է Քեսաբում: Մտահոգվում եմ ընկերներիս վիճակով: Քեսաբը երկրի երեսին իսկական դրախտ էր: Ի’նչ ափսոս, որ այս գեղեցկություններից ոչ մի հետք չի մնալու: Կան վկայություններ, որ թալանն իրականացվում է Թուրքիայից եկած միջոցներով»,- ասել է Չեթինօղլուն: Թուրք մտավորականը նշել է, որ եթե 1915 թվականին հայերի հարստությունը աչքի էր զարնել և Ցեղասպանության ժամանակ բռնագրավվել, ապա նույնը տեղի է ունենում նաև այս օրերին Քեսաբի հայերի դեպքում:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումն սկսվել է մարտի 21-ին' Թուրքիայի սահմանի ութ կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքում գրեթե բնակիչներ չեն մնացել, նրանք տեղափոխվել են առավել ապահով վայրեր: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: