ԱՄՆ Սենատի թեկնածուն հանձն է առնում սատարելու ամերիկահայերի գերակայություններին

Հայ դատի ԱՄՆ հանձնախումբը ջերմորեն ողջունում է Միացյալ Նահանգների Սենատի՝ Վիրջինիա նահանգի թեկնածու Էդ Գիլեսփիի դիրքորոշումը ամերկահայերին հուզող խնդիրների վերաբերյալ: Ինչպես «Արմենպրես»-ին հայտնեցին Հայ դատի ԱՄՆ հանձնախմբից, հանրապետական թեկնածուն առանձին նամակով հաստատել է, որ 1915 թվականի Հայոց ցեղասպանությունը անվիճելի փաստ է, որ ինքը սատարում է կոնգրեսական Էդ Ռոյսի՝ Թուրքիայի հայկական եկեղեցիներն իրենց օրինական տերերին վերադարձնելու արշավին, հանձն է առնում առևտրային համաձայնագրերի և նոր հարկային պայմանագրի միջոցով խթանել ԱՄՆ-Հայաստան տնտեսական կապերը և վերջապես խոստացել է Սենատում իր պաշտոնավարման առաջին շրջանում կոնգրեսական պատվիրակության հետ այցելել Հայաստան: Հայ դատի Վիրջինիայի մասնաճյուղի ակտիվիստներից Մելանի Քերնեքլյանը կարևորել է նման ուժեղ դաշնակցի աջակցությունը Հայ դատն առաջ տանելու համար:

«Մենք խորապես գնահատում ենք Էդ Գիլեսփի դիրքորոշումը ամերիկահայ համայնքին հուզող խնդիրների վերաբերյալ և անհամբերությամբ սպասում ենք նրա տեսակետները պետության շահագրգիռ ընտրողների շրջանում տարածելու հնարավորությանը, ովքեր մտածում են Հայաստանի մասին»,- ասել է Հայ դատի գործադիր տնօրեն Արամ Համփարյանը:

Սենատի ընտրություններում Գիլեսփի մրցակիցն է գործող սենատոր Մարկ Ուորները, ով նահանգապետ եղած տարիներին նույնպես աջակցել է հայկական խնդիրներին, սակայն Կապիտոլիումի բլրում վեցամյա պաշտոնավարման ընթացքում որևէ ակտիվ քայլ չի կատարել ամերիկահայերին հետաքրքրող հանրային քաղաքականության հարցերով: