Ջրագծի վթարը Կապանում մեծ ավերածություններ է արել. վեց ընտանիք կբնակվի հյուրանոցում

Կապանի Բաղաբերդ թաղամասի թիվ 17 շենքի հարեւանությամբ անցնող քաղաքը խմելու ջրով ապահովող գլխավոր ջրատարում նոյեմբերի 2-ի առավոտյան ժամը 08.30-ի սահմաններում վթար է տեղի ունեցել, ինչը մեծ ավերածությունների պատճառ է դարձել:

Բարեբախտաբար, մարդիկ չեն տուժել, սակայն վթարված խողովակից դուրս մղված մոտ 20 մ բարձրությամ բ ջրի շիթը վնասել է շենքի 15 բնակարաններ' հիմնականում ջարդվել են պատուհանները, վնասվել գույքը: Մասնակիորեն վնասվել են նաեւ շենքի տանիքն ու առաջին հարկում տեղակայված թիվ 5 մանկապարտեզի երկու խմբասենյակները, երկու ննջասենյակները, հաշվապահի կաբինետը եւ այլն: Վթարի հետեւանքով ընդհանուր հաշվով ջրով ողողվել է մոտ 6000 քմ տարածք: Վնասվել են նաեւ 3 մարդատար մեքենա եւ թաղամասի մարզադաշտը, որտեղով անցնում է ջրագիծը: Վթարի պատճառով հասցվել է նյութական մեծ վնաս, որի չափերը հաշվարկվում են մարզպետարանի ու քաղաքապետարանի ԱԻ մշտապես գործող հանձնաժողովների կողմից: Առաջինը, ստացված ահազանգից հետո դեպի վայր են ժամանել ԱԻ Սյունիքի մարզային փրկարարական ծառայության աշխատակիցները, որոնց կողմից ձեռնարկվել են բոլոր միջոցառումները' բնակիչների անվտանգությունն ապահովելու համար:

Դեպքի վայր են ժամանել նաեւ Սյունիքի փոխմարզպետ Վաչե Գրիգորյանը, Կապանի քաղաքապետ Աշոտ Հայրապետյանը եւ այլ պաշտոնատար անձինք:

«Հետեւողական ենք լինելու, որպեսզի բոլոր խնդիրները ժամանակին լուծում ստանան: Վնասի չափերի ճշտելուց հետո «Հայջրմուղը» նյութական վնասը պետք է հատուցի ամբողջությամբ: Համայնքն էլ իր հերթին անելու է հնարավոր ամեն ինչ' վթարի հետեւանքները վերացնելու եւ բնակիչներին աջակցելու համար», «Արմենպրես»-ին ասաց քաղաքապետը եւ հավելեց, որ արդեն լուծվել է բնակիչներին կացարանով ապահովելու խնդիրը: Կացարանի կարիք ունեցող 6 ընտանիքներ ժամանակավորապես կբնակվեն «Լեռնագործ» հյուրանոցում:

Դեպքից անմիջապես հետո Հայջրմուղկոյուղու աշխատակիցների կողմից վերացվել է վթարը, սկսվել են վերականգնողական աշխատանքները: Մասնավորապես, Կապանի կոմունալ ծառայության աշխատակիցների ջանքերով ապակուց, քարերից ու ավազից մաքրվում են մանկապարտեզի տարածքը, սկսվել են տանիքի նորոգման աշխատանքները, կկատարվեն նաեւ մարզադաշտի մաքրման աշխատանքներ:

Վնասի չափերը ճշտելու նպատակով քաղաքապետարանի քաղաքաշինության բաժնի աշխատակիցների կողմից կատարվում են չափագրման աշխատանքներ: Քաղաքապետի հանձնարարությամբ համատիրությունը կստեղծի թաղամասի կամավորների խումբ' վթարի հետևանքների վերացման աշխատանքներին աջակցելու համար: Հայջրմուղկոյուղու Կապանի տեղամասի պետ Հովհաննես Գեւորգյանի խոսքով, վերջին շրջանում Կապանում շատացել են վթարները ջրատարում, քանի որ դեռեւս անցած դարի 60-ական թվականներից տեղադրված խողովակները մաշված են:

Ընթացքի մեջ են քաղաքի ջրագծի նորացման աշխատանքները, որոնց ավարտից հետո նման դեպքերը կբացառվեն: «Ծրագրով նախատեսվում է ջրի ճնշումը իջեցնել խողովակաշարում, կառուցել մարիչ հոր, որը ճնշումը վթարված հատվածում կհասցնի 18-20 մթնոլորտ ներկայիս 25-30 մթնոլորտի փոխարեն», - ասաց «Հայջրմուղկ ոյուղի» ՓԲԸ «Կապան» տեղամասի պետ Հովհաննես Գեւորգյանը: Ժամը 17.00-ից Կապանում կվերականգնվի ջրամատակարարման գրաֆիկը, որը խափանվել էր վթարի պատճառով: