Հարցումը ցույց է տվել, թե ամերիկացիներն ինչպես են վերաբերվում Թրամփին եւ Քլինթոնին

Ամերիկացիների մեծամասնությունը Հիլարի Քլինթոնին եւ Դոնալդ Թրամփին «ռիսկային» թեկնածուներ է համարում ԱՄՆ-ի նախագահի պաշտոնի համար: Այդ են վկայում այն հարցման տվյալները, որը համատեղ անցկացրել են New York Times հրատարակությունը եւ CBS News հեռուստաալիքը:

Հարցման մասնակիցներին առաջարկել են պատասխանել հետեւյալ հարցին. «Հիլարի Քլինթոնի/Դոնալդ Թրամփի ընտրվելն արդյոք դուք երկրի համար անվտանգ կամ ռիսկային ընտրություն եք համարում»:

Հետազոտության արդյունքների համաձայն՝ հարցվածների ավելի քան 67 տոկոսը Թրամփին ռիսկային թեկնածություն է համարում առաջիկա ընտրություններում, Քլինթոնի վերաբերմամբ նույն կարծիքը հայտնել է մասնակիցների 51 տոկոսը:

Բացի դրանից, ԱՄՆ-ի բնակիչների մեծամասնությունը հայտարարել է, որ Քլինթոնին եւ Թրամփին չի համարում ազնիվ եւ վստահություն ներշնչող (հարցվածների համապատասխանաբար 63 տոկոսը եւ 60 տոկոսը): Ամերիկացիներին նաեւ առաջարկվել է պատասխանել ԱՄՆ-ի նախագահի պաշտոնի թեկնածուների անձնական բնութագրերի հետ կապված հարցերին: Այսպես, հարցվածների 64 տոկոսը կարծում է, որ Դոնալդ Թրամփն օժտված չէ լավ նախագահ դառնալու անհրաժեշտ խառնվածքով եւ բնավորության առանձնահատկություններով: Քլինթոնի կապակցությամբ նույն այդ կարծիքին է հարցման մասնակիցների 44 տոկոսը:

Ինչպես նշվում է հրատարակության կայքում, հարցվածների միայն 36 տոկոսն է հավատում, որ Քլինթոնը կկարողանա փոփոխություններ մտցնել Վաշինգտոնում իրականացվող գործերում, 48 տոկոսն այդ հարցում վստահում է Թրամփին: Ամերիկացիների մեծամասնությունը հավատում է, որ Քլինթոնը Թրամփից ավելի լավ գլուխ կհանի արտաքին քաղաքականության, միգրացիայի, ահաբեկչության եւ ազգային անվտանգության հարցերից: Թրամփը, իր հերթին, պետք է որ ավելի լավ գլուխ հանի տնտեսության եւ աշխատատեղերի հարցերից. այդպես է կարծում մասնակիցների 51 տոկոսը:

Հարցումը, որն անցկացվել է սեպտեմբերի 9-ից մինչեւ 13-ը, 1433 մարդ է մասնակցել գրանցված ընտրողներից թվից. հարցման վիճակագրական անճշտությունը պլյուս-մինուս երեք տոկոսային կետ է, հաղորդել է ՌԻԱ Նովոստին: