Գերմանացիները կանցլերի պաշտոնի թեկնածուների թվում նախապատվությունը տալիս են Մերկելին և Շուլցին

ԳՖՀ-ի նոր կանցլերի պաշտոնի թեկնածուների շարքում գերմանացիները նախապատվությունը տալիս են երկրի գործող ղեկավար Անգելա Մերկելին եւ Եվրախորհրդարանի նախագահ Մարտին Շուլցին:

Ինչպես վկայում են հարցման արդյունքները, որն անցկացրել է Forsa հետազոտական ինստիտուտը, կանցլերի ուղղակի ընտրությունների դեպքում Մերկելի օգտին կքվեարկեր հարցվածների 45 տոկոսը, Շուլցի օգտին՝ 29 տոկոսը: Ընդ որում՝ գործող փոխկանցլեր Զիգմար Գաբրիելը առայժմ կարող է ակնկալել միայն 18 տոկոսի աջակցությունը:

Գերմանիայում կանցլերին ընտրում են ոչ ուղղակի քվեարկությամբ, այլ խորհրդարանական ընտրությունների արդյունքում. թեկնածուին առաջարկում են հաղթած կուսակցությունները:

Հարցումը հոկտեմբերի 6-ին եւ 7-ին անցկացվել է Stern հանդեսի եւ RTL-Wahltrend հեռուստածրագրի պատվերով, դրան մասնակցել է 1002 մարդ: Հարցման անճշտությունը կազմում է մոտավորապես 3 տոկոս:

Մինչդեռ ավելի վաղ Bild թերթը՝ վկայակոչելով Insa հետազոտական ինստիտուտի կողմից անցկացված հարցման տվյալները, հայտնել Է, որ Բունդեսթագում Անգելա Մերկելի դաշինքը, որը բաղկացած է «Քրիստոնեադեմոկրատական միություն» (ՔԴՄ) եւ Քրիստոնեասոցիալական միություն» (ՔՍՄ) կուսակցություններից, սահմանել է ժողովրդականության հակառեկորդ: Դաշինքին ցուցաբերվող աջակցությունն ընկել է ձայների մինչեւ 29,5 տոկոսի նշագիծ: Նրա համար դա վատագույն արդյունքն է պատմության մեջ: Մինչ այդ ՔԴՄ/ՔՍՄ միավորման հակառեկորդը եղել է ընտրողների ձայների 30 տոկոս նշագիծը, հաղո րդել է ՌԻԱ Նովոստին: