Անկարայում աշխատանքից դատավորներ և դատախազներ են հեռացվել

Թուրքիայի ռազմական հեղաշրջման ձախողված փորձից հետո երկրի ռազմական և իրավական համակագում զտումները շարունակվում են: Ինչպես հաղորդում է թուրքական «Հուրիեթ» պարբերականը, Անկարայի հանրապետական դատախազություն ից աշխատանքից ազատվել է 189 դատավոր և դատախազ:

Հաղորդվում է, որ աշխատանքից հեռացվածներն օգտագործել են ByLock հավելվածը գյուլենականների հետ հաղորդակցվելու համար:

Թուրքիայի իշխանությունները երկրում հուլիսի 15-ի ռազմական հեղաշրջման փորձը կազմակերպելու մեջ մեղադրում են չափավոր իսլամական քարոզիչ Ֆեթուլլահ Գյուլենին: Այս կապակցությամբ, երկրի պետական և մասնավոր ոլորտները սկսել են մաքրել գյուլենականներից:

Գյուլենը, սակայն, ի սկզբանե հերքել է մասնակցությունը կատարվածին: Նա կատարվածի կազմակերպիչ է հայտարարել Թուրքիայի նախագահ Ռեջեփ Թայիփ Էրդողանին, ով այդպիսով փորձել է ամրապնդել իշխանությունը: