Իրաքյան բանակը 50-ից ավելի բնակավայրեր է ազատագրել Մոսուլի մատույցներում

Իրաքի կառավարական ուժերը Մոսուլի հարավային մատույցներում 50-ից ավելի բնակավայրեր են ազատագրել «Իսլամական պետություն» ահաբեկչական խմբավորման զինյալներից: Այդ մասին հայտնել է «Ալ Արաբիա» հեռուստաալիքը:

Նրա տեղեկատվության համաձայն՝ խոսքը վերաբերում է Էլ Կիյարա քաղաքի եւ Մոսուլի միջակա ռազմավարական առումով կարեւոր տարածաշրջանում գտնվող բնակավայրերին:

Հուլիսի կեսին հակաահաբեկչական հատուկ ուժերը ԻՊ-ից լիովին ազատագրել էին Էլ Կիյարային հարող շրջանները, այդ թվում՝ վտանգազերծել էին օդանավակայանը եւ քաղաքի մերձակա ռազմակայանը: Այն ժամանակ նաեւ հայտարարվել էր, որ կառավարական ուժերը էլ Կիյարայի տարածաշրջանը որպես հիմնական հենակետ են դիտում Մոսուլի ազտագրման գործողությունն սկսելու համար:

Մոսուլի ազատագրման ցամաքային ռազմական գործողությունն սկսվել է հոկտեմբերի 17-ի առավոտյան: Դրանում ներգրավված ցամաքային ուժերի ընդհանուր թվաքանակը հասնում է 60 հազարի, հաղորդել է ՏԱՍՍ-ը: