Պարզվել է՝ Չինաստանի դատախազը 149 սեփական բնակարան ունի. դատախազը ձերբակալված է

Չինաստանի իշխանությունները Նանչան քաղաքի (Արեւելյան Չինաստանի Ցզյանսի նահանգի վարչական կենտրոնի) դատախազության բաժնի պետի տեղակալ Սյույ Լինբաոյի եւ նրա ազգականների սեփականության մեջ հայտնաբերել են 110 մլն յուան (մոտավորապես 16,3 մլն դոլար) ընդհանուր արժեքով 149 բնակարան: Այդ մասին այսօր՝ նոյեմբերի 3-ին, հայտնել է «Սինա» լրատվական պորտալը:

Հետաքննության տվյալներով՝ Սյույ Լինբաոն իր փեսայի՝ ոմն Լուն Յուեուի հետ հանցավոր համաձայնության գալով, խարդախությամբ վարկային քարտերով քաղաքի բանկերից մեկում 96 մլն յուանի (մոտավորապես 14,2 մլն դոլար) վարկ է ձեւակերպել եւ ձեռք բերել այդ անշարժ գույքը:

Ինչպես նշում է «Սինա»-ն, ներկայում դատախազությունից Սյույ Լինբաոյի գործընկերներն արդեն Լուն Յուեուին եւ դատախազի տեղակալին ձերբակալելու կալանագիր են տվել: Իրավապահ մարմինները հետաքննություն են սկսել, հաղորդել է ՏԱՍՍ-ը: