ԵԽ զեկուցողն առաջարկել է առկախել Թուրքիայի հետ ԵՄ անդամակցության շուրջ բանակցությունները

Ընդհանուր արտաքին և անվտանգության քաղաքականության հարցերով Եվրամիության բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինին և Եվրոպական հարևանության քաղաքականության հանձնակատար Յոհաննես Հանը համատեղ հայտարարություն են տարածել` կապված Թուրքիայում քրդամետ ընդդիմադիր Ժողովուրդների դեմոկրատական կուսակցության անդամ 11 պատգամավորների, այդ թվում և կուսակցության համանախագահների ձերբակալո ւթյան հետ: Այս մասին տեղեկացնում են ԵՄ արտաքին գործերի ծառայությունից:

«Եվրամիությունը լրջորեն անհանգստացած է Ժողովուրդների դեմոկրատական կուսակցության մի շարք անդամների ձերբակալման փաստի առնչությամբ, ովքեր մեղադրվում են ահաբեկչական գործողություններին աջակցելու մեջ: Այս զարգացումները գումարվել են այն մտահոգություններին, որոնք մենք հայտնել ենք այս տարվա մայիսին ժողովրդավարական ճանապարհով ընտրված ավելի քան 130 պատգամավորի անձեռնմխելիությունը վերացնելու ժամանակ»,- ասվում է հայտարարության մեջ:

ԵՄ ներկայացուցիչները օրինական են համարել Թուրքիայում Քրդական բանվորական կուսակցության (PKK) դեմ իրականացվող գործողությունները, սակայն ընդգծել են, որ դրանք չպետք է հակասեն ժողովրդավարության հիմնարար սկզբունքներին:

«Մենք ակնկալում ենք, որ Թուրքիան կպաշտպանի իր խորհրդարանական ժողովրդավարությունը՝ այդ թվում և հարգելով մարդու իրավունքներն ու օրենքի գերակայությունը, և մենք մեր ակնկալիքներն ուղղակիորեն փոխանցում ենք թուրքական իշխանություններին: Եվրոպայի խորհրդի հետ Եվրամիությունը շարունակելու է ուշադիր կերպով հետևել իրադրությանը` մշտական կապի մեջ լինելով ԵՄ անդամ պետությունների հետ»,- նշվում է Մոգերինիի և Հանի հայտարարության եզրափակիչ հատվածում:

Եվրոպայի խորհրդի' Թուրքիայի հարցերով զեկուցող Քեթի Փիրին, անդրադառնալով Թու րքիայի վերջին զարգացումներին, BBC-ի թուրքական ծառայությանը ասել է, որ Բրյուսելից հստակ ազդանշանի է սպասում Թուրքիայի հետ ԵՄ անդամակցության բանակցություններն առկախելու վերաբերյալ: