Հարավային Կորեայի քաղաքացիների 75 տոկոսը պաշտպանում է երկրի նախագահի պաշտոնազրկումը

Կորեայի Հանրապետության քաղաքացիների ավելի քան 75 տոկոսը հանդես է գալիս երկրի նախագահ Պակ Կըն Հեի պաշտոնազրկման օգտին: Այդ մասին վկայում են այն հարցման հրապարակված տվյալները, որն անցկացրել է Real Meter սոցիոլոգիական ընկերությունը:

«Հետազոտության ընթացքում հարցվածների 75,3 տոկոսն արտահայտվեց պետության ղեկավարի իմպիչմենտի օգտին: Դա 4,2 տոկոսով պակաս է , քան մեկ շաբաթ առաջ,- նշվում է հաղորդագրության մեջ:- Պաշտոնազրկման դեմ հանդես եկողների թիվն աճել է 2,6 տոկոսով՝ մինչեւ 17,3 տոկոս»: Հարցմանը մասնակցել են 1050 չափահաս քաղաքացիներ, վիճակագրական անճշտությունը կազմում է 3 տոկոս:

Հետազոտությունն անցկացվել է այն բանից անմիջապես հետո, երբ նախագահ Պակ Կըն Հեն նոյեմբերի 30-ին հեռուստաուղերձով դիմեց ազգին: Դրանում նա իր պաշտոնը թողնելու պատրաստակամություն է հայտնել, երբ դրա համար կստեղծվեն անհրաժեշտ քաղաքական պայմաններ: «Ես առաջարկում եմ խորհրդարանին վճռել իմ ապագան, ներառյալ իմ նախագահության ժամկետի կրճատումը»,- ընդգծել է նա:

Դրանից հետո խորհրդարանում «Սենուրի» կառավարող կուսակցությունից նրա կողմնակիցները հայտարարեցին, որ անհրաժեշտ է մանրակրկիտ քննարկել նախագահի առաջարկը եւ մշակել իշխանության հանձնման համապատասխան ծրագիր, քանի որ նրա անհապաղ հրաժարականը կբերի արդեն հունվարին խորհրդարանի վաղաժամկետ ընտրություններ անկացնելու անհրաժեշտության: Նրանց կարծիքով՝ լավագույն տարբերակը կլիներ Պակ Կըն Հեի պաշտոնաթղությունը ապրիլին, որպեսզի նոր ընտրություններն անցկացվեին հունիսին:

Ընդդիմությունը երկրի ղեկավարի այդ քայլը գնահատել է որպես «ժողովրդին խաբելու» եւ զբաղեցրած պաշտոնից հեռանալը անորոշ ժամանակով հետաձգելու փորձ: Ընդդիմության ներկայացուցիչները հայտարարել են, որ մտադիր են նախագահի պաշտոնաթողության հասնել արդեն մինչեւ հունվար:

Հարավային Կորեայի դատախազությունը նոյեմբերի 20-ին հետաքննության միջանկյալ արդյունքներ է տարածել Չխվե Սուն Սիլի՝ Պակ Կըն Հեի մտերիմ ընկերուհու գործով: Դրանց համաձայն՝ Չխվե Սուն Սիլին, ինչպես նաեւ նախագահի վարչակազմի երկու նախկին աշխատակիցների մեղադրանքներ են առաջադրված կոռուպցիայի, կաշառաշորթության եւ ծառայողական լիազորությունների չարաշահման մեջ: Համարվում է, որ նրանք ստիպել են 50-ից ավելի հարավկորեական ընկերությունների տասնյակ միլիոնավոր դոլարներ փոխանցել Չխվե Սուն Սիլի կողմից վերահսկվող երկու հիմնադրամներ, որոնք հատուկ ստեղծվել են այդ նպատակով: Քննիչների կարծիքով, Պակ Կըն Հեն առնվազն տեղյակ է եղել ընկերուհու եւ իր ենթակաների այդ գործողություններին եւ, ամենայն հավանականությամբ, ինքն էլ է մասնակցել դրանց, հաղորդել է ՏԱՍՍ-ը:

Լուսանկարը' AP