Հարավային Կորեայի խորհրդարանն սկսել է նախագահի պաշտոնազրկման ընթացակարգը

Հարավային Կորեայի խորհրդարանը պաշտոնապես գործարկել Է հանրապետության նախագահ Պակ Կըն Հեի նկատմամբ իմպիչմենտի ընթացակարգը: Պաշտոնազրկման հարցի շուրջ քվեարկությունը պետք Է կայանա առաջիկա 72 ժամվա ընթացքում, տեղեկացնում Է BBC-ն:

Հավանական Է, որ այն տեղի կունենա դեկտեմբերի 9-ին՝ ընթացիկ խորհրդարանական նստաշրջանի վերջին օրը: Դիտորդները ենթադրում են, որ ընդդիմությունը բավարար ռեսուրսներ ու փաստարկներ ունի այդ քվեարկության ընթացքում հաղթանակի հասնելու համար:

Եթե պաշտոնազրկման վերաբերյալ որոշումն ընդունվի, երկրի Սահմանադրական դատարանը 180 օրվա ընթացքում պետք է որոշի՝ Պակ Կըն Հեին հեռացնե՞լ իշխանությունից: Մինչ դատարանը որոշում կընդունի, երկիրը կկառավարի վարչապետը:

Նոյեմբերի վերջին Հարավային Կորեայի նախագահ Պակ Կըն Հեն, որի շուրջ կոռուպցիոն սկանդալ է ծավալվել, հայտարարել է, որ իր հետագա ճակատագիրը պետք է վճռի երկրի խորհրդարանը: Ազգին հղած հեռուստաուղերձում նա ներողություն է խնդրել տեղի ունեցածի համար եւ ընդգծել, որ անհրաժեշտության դեպքում պատրաստ է պաշտոնաթող լինել մինչեւ 2018 թվականին նախագական ժամկետի ավարտը:

Ավելի վաղ դատախազությունը նախագահի օգնական Չխվե Սուն Սիլին մեղադրել է այն բանում, որ նա անօրինականորեն ստիպում էր խոշոր բիզնեսին բազմամիլիոնանոց նվիրատվություններ անել իր հետ կապված ոչ կառավարական հիմնադրամներին: Նոյեմբերի 20-ին Չխվե Սուն Սիլին պաշտոնական մեղադրանքներ են առաջադրվել իշխանության չարաշահման եւ լիազորությունների վերազանցման համար:

Սահմանադրությանը համապատասխան, դատախազությունը չի կարող քրեական մեղադրանքներ ներկայացնել հանրապետության գործող նախագահին, քանի որ նա օժտված է անձեռնմխելիությամբ, սակայն գերատեսչությունը հայտարարել է կոռուպցիոն սկանդալին Պակ Կըն Հեի մեղսակցության մասին:

«Երկիրը ցնցած սկանդալի մի քանի շաբաթ տեւած ինտենսիվ հետաքննությունից հետո քննիչները եկան այն եզրակացության, որ Պակ Կըն Հեն անմիջականորեն խառն է դրան»,- հարավկորեական դատախազության ներկայացուցչի խոսքը մեջբերել է «Յոնհապ» գործակալությունը: