Ղրղզստանի հանրաքվեում Սահմանադրության փոփոխման օգտին քվեարկել է քաղաքացիների 79,59 տոկոսը

Ղրղզստանի քաղաքացիների գրեթե 80 տոկոսը դեկտեմբերի 11-ին կայացած հանրաքվեում պաշտպանել է հանրապետության Սահմանադրության մեջ փոփոխություններ կատարելը: Այդ մասին դեկտեմբերի 12-ին ՏԱՍՍ-ին հայտնել են Ընտրությունների եւ հանրաքվեների անցկացման կենտրոնական ընտրական հանձնաժողովում:

Նախնական տվյալներով՝ հանրահարցմանը մասնակցել է ընտրական ցուցակներում ներառված 2,85 մլն քաղաքացիների 42,07 տոկոսը: «Նրանց 79,59 տոկոսը հավանություն է տվել հիմնական օրենքի՝ առաջարկված փոփոխություններին, 15,4 տոկոսը դեմ է արտահայտվել»:

Ղրղզստանի Սահմանադրության ուղղումները պետք է ուժի մեջ մտնեն 2017 թվականի դեկտեմբերից: Դրանք նախատեսում են նախագահի լիազրությունների կրճատում, վարչապետի եւ խորհրդարանի գործառույթների ընդլայնում, ինչպես նաեւ դատական ու իրավապահ համակարգերի բարեփոխում:

Այս տարվա ամռանը Սահմանադրության փոփոխման նախաձեռնողներ են հանդես եկել ազգային խորհրդարանի պատգամավորները, ավելի ուշ նրանց առաջարկը պաշտպանել է երկրի նախագահ Ալմազբեկ Աթամբաևը:

Լուսանկարը' ТАСС