Հալեպից տարհանվել են ևս գրեթե 7,8 հազար բնակիչներ

Հալեպի՝ զինյալների կողմից վերահսկվող շրջաններից վերջին մեկ օրվա ընթացքում դուրս են բերվել եւս գրեթե 7,8 հազար բնակիչներ: Այդ մասին հայտնել է Սիրիայի հակամարտող կողմերի հաշտեցման ռուսական կենտրոնը:

«Մեկ օրում Հալեպի՝ զինյալների հսկողության տակ մնացող շրջաններից, հակամարտող կողմերի հաշետեցման կենտրոնի աջակցությամբ, դուրս են բերվել 7796 խաղաղ բնակիչներ, այդ թվում 3946 երեխաներ: Զենքը վայր են դրել եւ քաղաքի արեւմտյան մաս են եկել 375 զիյալներ»,- ասված է հաղորդագրության մեջ:

«Նրանց բոլորին տեղավորում են հատուկ հումանիտար կենտրոններում, որտեղ նրանք ապահովվում են սննդով, անհրաժեշտության դեպքում նրանց բուժօգնություն է ցուցաբերվում»,- հավելել են կենտրոնում:

Դեկտեմբերի 12-ի երեկոյան ԶԼՄ-ները հայտնել են, որ սիրիացի զինվորականներն ու աշխարհազորայինները լիակատար հսկողություն են հաստատել Հալեպի արեւելյան մասի նկատմամբ եւ ճնշում են դիմադրության վերջին օջախները: Բանակային ստորաբաժանումները, որոնց հրամանատարն է գնդապետ Սուխեյլ ալ Հասանը, հակառակորդին հետապնդում են քաղաքի հարավ - արեւելքի Սալահ Էդ Դին եւ Էս Սուքարի թաղամասերի մի քանի հատվածներում:

«Ալ Իխբարիա» հեռուստաալիքի վկայությամբ՝ սիրիական բանակի եւ աշխարհազորայինների կողմից Ֆիրդոուսի թաղամասում զինյալների խոշոր պատվարի նկատմամբ վերահսկողության հաստատման լուրն ընդհանուր ցնծություն է առաջացրել: Մարդիկ համարել են, որ Հալեպի համար ճակատամարտն ավարտված է, հաղորդել է ՏԱՍՍ-ը: