Ֆիլիպինների նախագահին պաշտոնազրկում է սպառնում. Reuters

Ֆիլիպինների նախագահ Ռոդրիգո Դուտերտեի նկատմամբ կարող է պաշտոնազրկման ընթացակարգ սկսվել նրա արած այն հայտարարությունների պատճառով, որ ինքը, լինելով Դավաո քաղաքի քաղաքագլուխ, անձամբ ենթադրյալ հանցագործների է սպանել ոստիկանության աշխատակիցներին օրինակ ցույց տալու նպատակով: Այդ մասին դեկտեմբերի 15-ին հայտնել է Reuters գործակալությունը՝ վկայակոչելով ֆիլիպինցի երկու սենատորների:

«Դա հրաժարում է ժողովրդի կողմից նրան ցուցաբերված վստահությունից եւ, Սահմանադրության համաձայն, առանձնապես ծանր հանցագործություն: Զանգվածային սպանությունները չեն կարող այլ կերպ գնահատվել, իսկ առանձնապես ծանր հանցագործությունը հիմք է պաշտոնազրկման համար»,- հայտարարել է սենատորներից մեկը:

«Նման բան ասելով, նա մատնել է իրեն, ուստի միանգամայն օրինական կլիներ նրան իմպիչմենտ հայտարարելը»,- ասել է Սենատի մեկ այլ անդամ: Reuters-ի տվյալներով՝ Ներկայացուցիչների պալատում (ստորին պալատ) Դուտերտեին կտրականապես դեմ են տրամադրված 297 պատգամավորներից 50-ը, ինչը բավարար չէ իմպիչմենտ հայտարարելու համար:

Ֆիլիպինների նախագահ Ռոդրիգո Դուտերտեն նախօրյակին հայտարարել է, որ, լինելով Դավաոյի քաղաքագլուխ՝ անձամբ էր սպանում ենթադրյալ հանցագործներին՝ ոստիկանության աշխատակիցներին այն բանի օրինակ տալու նպատակով, որ քրեական տարրերի հետ անհրաժեշտ է դատաստան տեսնել խստորեն: «Դավաոյում ես դա անձամբ էի անում, պարզապես որպեսզի ոստիկաններին ցույց տամ, որ եթե ես կարող եմ դա անել, ինչու դա չեն կարող անել իրենք»,- պետության ղեկավարի խոսքը մեջբերում է AFP գործակալությունը:

71-ամյա Ռոդրիգո Դուտերտեն Մանիլայի վարչակազմի ղեկավարի պաշտոնն ստանձնել է այս տարվա հունիսի 30-ին: Ավելի վաղ նա յոթ ժամկետ անընդմեջ զբաղեցրել է Դավաոյի քաղաքագլխի պաշտոնը, որը գտնվում է Մինդանաո հարավային կղզում եւ բնակեցված է առավելապես մուսուլմաններով, հաղորդել է ՏԱՍՍ գործակալությունը:

Լուսանկարը' AP