Բրիտանիայի նախկին վարչապետ Դևիդ Քեմերոնը կարող է դառնալ ՆԱՏՕ-ի գլխավոր քարտուղար. Daily Mail

Մեծ Բրիտանիայի նախկին վարչապետ Դեւիդ Քեմերոնը համարվում է ՆԱՏՕ-ի գլխավոր քարտուղարի պաշտոնի ամենահավանական հավակնորդներից մեկը: Այդ մասին գրում է Daily Mail թերթը՝ հղում անելով անունները չնշված պաշտոնյաների:

Նրանց կարծիքով՝ եթե Բրիտանիայի վարչապետ Թերեզա Մեյը Քեմերոնին առաջարկի այդ պաշտոնh համար, որն ավելի քան 260 հազար եվրո աշխատավարձ է ենթադրում, շատերը կպաշտպանեն նախկին վարչապետի թեկնածությունը:
Քեմերոնի ներկայացուցիչը դեռեւս չի մեկնաբանել այդ տեղեկատվությունը:

Բրիտանիան ազդեցություն ունի ՆԱՏՕ-ում, քանի որ «ռազմական առումով առավել նշանակելի երկիրն է» դաշինքում ԱՄՆ-ից հետո: Ինչպես նշում է հրատարակությունը, Միացյալ Թագավորությունը շահագրգռված է, որ երկրի քաղաքացին ստանա այդ պաշտոնը: Նախ դա թույլ կտա Բրիտանիային «ավելի կարեւոր դեր խաղալ Եվրոպայի անվտանգության հարցում», եւ երկրորդ՝ երկրին հնարավորություն կտա «ԵՄ-ի գծով դաշնակիցներին ցույց տալ, որ ինքը ցանկանում է Brxit-ից հետո կառուցողական դեր խաղալ աշխարհամասում»:

«Մենք պետք է նրա համար տեղ գտնենք, նա շատ բան կարող է առաջարկել: Մենք պետք է համոզենք նրան՝ վերստին մարտնչել Բրիտանիայի համար»,-թերթը մեջբերել է նախարարների կաբինետի անդամներից մեկի խոսքը:
Կառավարությունում Քեմերոնի դաշնակիցներն այն կարծիքին են, որ երկիրը միայն կշահի նման նշանակումից: Նրանք հայտարարել են, որ նախկին վարչապետը պատրաստ է դիտարկել այդ հնարավորությունը:

Ներկայում ՆԱՏՕ-ի գլխավոր քարտուղարի պաշտոնն զբաղեցնում է Ենս Ստոլտենբերգը: Նորվեգիայի նախկին վարչապետը այդ պաշտոնը կթողնի 2018 կամ 2019 թվականին: Մեծ Բրիտանիայի քաղաքացիները երեք անդամ գլխավորել են Հյուսիսատլանտյան դաշինքը: 1952-ից մինչեւ 1957 թվականը ՆԱՏՕ-ի գլխավոր քարտուղարն էր Հասթինգս Իսմեյը, 1984-ից մինչեւ 1988 թվականը՝ Փիթեր Քարինգթոնը, իսկ 1999-ից մինչեւ 2003 թվականը՝ Ջորջ Ռոբերտսոնը:

Մեծ Բրիտանիայի նախկին վարչապետ Դեւիդ Քեմերոնը պաշտոնաթող եղավ այն բանից հետո, երբ բրիտանացիները քվեարկեցին ԵՄ-ից երկրի դուրս գալու օգտին: Նոր վարչապետ դարձավ Մեծ Բրիտանիայի ներքին գործերի նախկին նախարար Թերեզա Մեյը, հաղորդել է ՌԻԱ Նովոստին: