Հնդկաստանում Նոբելյան մրցանակի դափնեկրից գողացել են պարգևատրման հավաստագիրը

Հնդկաստանի մայրաքաղաքում գողերը գիշերը կողոպտել են նոբելյան դափնեկիր եւ հայտնի իրավապաշտպան Քայլաշ Սաթյարթիի բնակարանը՝ հափշտակելով նրա նոբելյան հավաստագիրը: Այս մասին հայտնել է The Hindu թերթը՝ վկայակոչելով քաղաքային ոստիկանությանը:

Հրատարակության տվյալներով՝ գողությունը հայտնաբերել են Սաթյարթիի հարազատները: 63-ամյա իրավապաշտանն ինքը եղել է արտասահմանում. նա մեկնել էր Բոգոտա՝ մասնակցելու Նոբելյան դափնեկիրների գագաթնաժողովին: Հանցագործները նաեւ գողացել են թանկարժեք իրեր եւ էլեկտրոնիկա: Ինչպես նշում են մի շարք զանգվածային լրատվամիջոցներ, գողացված իրերի թվում կարող է լինել նոբելյան մեդալի՝ տանը պահվող պատճենը:

Ոստիկանությունը գրանցել է գործը եւ հետաքննություն է սկսել: Քայլաշ Սաթյարթին հնդիկ հայտնի իրավապաշտպան է եւ սոցիալական ակտիվիստ, որը հանդես է գալիս ի պաշտպանություն երեխաների իրավունքների: 2014 թվականին նա 17-ամյա պակիստանցի Մալալա Յուսուֆզայի հետ ստացել է խաղաղության Նոբելյան մրցանակ «երեխաների եւ երիտասարդության կեղեքման դեմ եւ հանուն բոլոր երեխաների կրթության իրավունքի» պայքարելու համար, հաղորդել է ՏԱՍՍ-ը:

Լուսանկարը' Reuters