Ձերբակալվել է Կիմ Չեն Նամի սպանության երկրորդ կասկածյալը

Մալայզիայի ոստիկանությունը ձերբակալել է Կիմ Չեն Նամի՝ ԿԺԴՀ-ի առաջնորդ Կիմ Չեն Ընի ավագ եղբոր ենթադրվող սպանության երկրորդ կասկածյալին: Այդ մասին փետրվարի 16-ին հայտնել է BERNAMA մալայզիական գործակալությունը:

Երկրի ոստիկանության ղեկավար Հալիդ Աբու Բաքարը նշել է, որ դրա վերաբերյալ պաշտոնական հայտարարություն կարվի ավելի ուշ: Այլ մանրամասնություններ առայժմ չեն ներկայացվում:

Նախօրյակին Մալայզիայի ոստիկանությունը Կիմ Չեն Նամի ենթադրվող սպանությանը մեղսակցության կասկածանքով ձերբակալել է մի կնոջ, որը պատրաստվում էր մեկնել Վիետնամ: Ըստ որոշ տվյալների՝ իրավապահ մարմինները որոնում են եւս մի քանի կասկածյալների:

Հարավային Կորեայի կառավարության իրազեկ աղբյուրը փետրվարի 16-ին The Dong-a IIbo թերթին հայտնել է, որ երկրորդ կասկածյալը պլանավորում էր Մալայզիայից մեկնել Կորեայի Հանրապետություն: «Ըստ մեր տվյալների՝ ձերբակալման ժամանակ նրա մոտ եղել է Սեուլ մեկնող ինքնաթիռի տոմս»,- հրատարակությունը մեջբերել է պաշտոնյայի խոսքը:

Մինչդեռ Kyodo News գործակալությունը հայտնել է, որ կասկածյալի մոտ հայտնաբերվել է ինդոնեզական անձնագիր: Ոստիկանության տվյալներով՝ կնոջը հաջողվել է բացահայտել տեսահսկման խցիկների գրանցումներով, կալանավորման պահին նա մենակ է եղել: Ներկայում իրավապահ մարմինների աշխատակիցները պարզում են՝ կապ կա արդյոք նրա եւ փետրվարի 15-ին ձերբակալված առաջին կասկածյալի միջեւ:

Կիմ Չեն Նամը ԿԺԴՀ-ի նախկին ղեկավար Կիմ Չեն Իրի ավագ որդին է, որը ծնվել է հյուսիսկորեացի հայտնի դերասանուհի Սոն Հե Ռիմի հետ արտամուսնական կապից: Կիմ Չեն Նամը մի ժամանակ համարվում էր Հյուսիսային Կորեայի ղեկավարի պաշտոնում հոր առավել հավանական հաջորդը, սակայն շնորհազրկման է ենթարկվել 2001 թվականին կեղծ անձնագրով Ճապոնիա մեկնելու փորձից հետո եւ այդ ժամանակվանից ապրում էր արտասահմանում, մասնավորապես, Չինաստանի Մակաո միջատարածքում, հաղորդել է ՏԱՍՍ-ը: