«Նորմալ քարտեզ հրապարակեք, պրոստը գիծ ա». Երևանի քաղաքապետը բարկացավ

«Անցած շաբաթվա ընթացքում «Երևանի ավտոբուս» ՓԲԸ կողմից թվով 1563 շարժակազմ եղել է աշխատանքի մեջ, որից 630-ը՝ «Հայգեր» մակնիշի, 484-ը՝ «Ժոնգ Տոնգ» եւ 449-ը՝ փոքր դասի ավտոբուսներ»: Այս մասին այսօր՝ փետրվարի 28-ին, Երևանի քաղաքապետարանում տեղի ունեցած աշխատանքային խորհրդակցության ժամանակ ասաց «Երևանի ավտոբուս» ՓԲԸ տնօրեն Էլբակ Թարփոշյանը՝ հավելելով, որ մարտի 1-ից ևս երկու երթուղի կսպասարկվի նոր «Ժոնգ Տոնգ» ավտոբուսներով:

Նա տեղեկացրեց, որ մարտի 1-ից միկրոավտոբուսային համար 8 եւ համար 31 գծերը կսպասարկվեն նոր «Ժոնգ Տոնգ» ավտոբուսներով.

«Համար 8 երթուղին համարը փոխվել է համար 11 ավտոբուսային երթուղու, իսկ համար 31-ը մնացել է նույնը: Ընդ որում, համար 11 երթուղու գիծը Արաքս մարզադաշտից մինչեւ Քանաքեռ ՀԷԿ է: Մեր կողմից փոփոխություն է եղել, առաջարկելով ընդգրկել նաեւ Բագրատունյաց ու Արշակունյաց հատվածի  կապը դեպի Ազատության պողոտա եւ Արաբկիր»,- նշեց Թարփոշյանը:

Քաղաքապետ Հրաչյա Սարգսյանն էլ դժգոհեց, որ քաղաքապետարանի կայքում նոր ավտոբուսներով երթուղիների վերաբերյալ քարտեզները անհասկանալի են.

«Երթուղուց չհասկացող, տեղեկություն չունեցող մարդը, եթե այդ քարտեզը բացի, պետք է հասկանա, թե նոր երթուղիներն ինչ հետագծով են սպասարկվելու: Այդ քարտեզից բացարձակապես հասկանալի չէ: Պարզապես անունը քարտեզ է, բայց բովանդակությունը չկա: Էդ քարտեզը վերանայեք, նրմալ քարտեղ դրեք: Եթե տեքստայինը կա, ստացվում է, որ քարտեզը ձեւի համար ենք դրել: Այն քարտեզը, որ դուք հրապարակել եք, շատ վատ քարտեզ է,- ասաց քաղաքապետը: