«Այստեղ «իմ ու քո» լինել չի կարող, միայն ՔՊ նախագահը չեմ լինելու, ոչ ես եմ դա ուզում, ոչ ՔՊ-ն». նախագահի թեկնածու

«Այստեղ «իմ ու քո» լինել չի կարող, ես այդպես եմ ընկալում և այդ ընկալմամբ եմ ձեր առջև հանդես գալիս: Ես միայն ՔՊ նախագահը չեմ լինելու, ոչ ես եմ դա ուզում, ոչ ՔՊ-ն».  Այս մասին այսօր՝ մարտի 2-ին, Ազգային ժողովում ասաց Հանրապետության նախագահի թեկնածու Վահագն Խաչատուրյանը՝ անդրադառնալով ՔՊ-ից Արսեն Թորոսյանի հարցին:

Արսեն Թորոսյանը նշեց՝ կարծես թե, հետևյալ կեղծ օրակարգն է գեներացվել:

«Դուք, ի վերջո, պատրաստվում եք լինել միայն մե՞ր նախագահը, թե՞ ՀՀ բոլոր քաղաքացիների»,-հարցրեց Թորոսյանը:

Խաչատուրյանն արձագանքեց.

«Ես համոզված եմ, որ դուք չեք ուզում, որ ես լինեմ միայն ձեր նախագահը: Դուք էլ համոզված եղեք, որ ես չեմ ուզում լինել միայն ձեր նախագահը: Ես Սահմանադրությամբ պարտավոր եմ լինել ՀՀ բոլոր քաղաքացիների նախագահը: ՀՀ նախագահը նաև համազգային խնդիրների լուծման ինստիտուտ է, և ես պատրաստվում եմ այդպես էլ լինել, այդ դերում հանդես գալ: Ինձ համար այդ դերում հանդես գալու որևէ խոչընդոտ չկա: Ավելին ասեմ՝ միգուցե, նաև իմ թեկնածությունը դուք ընտրել եք՝ հաշվի առնելով այդ հանգամանքը, ես այդպես եմ ենթադրում: Համենայնդեպս,  իմ մեջ տեսել եք այն մարդուն, որը կարող է այդ դերը կատարել: Եվ այսօրվա մեր մասնատված, ծանր սոցիալ-տնտեսական վիճակում գտնվող հասարակության համար շատ կարևոր է, որ հենց նախագահի ինստիտուտը, որը համախմբող է, աշխատի»:

Նա հավատացրեց, որ երբ այդ ինստիտուտն աշխատի, կպարզվի, թե ինչ մեծ անելիքներ ունի: Սակայն Խաչատուրյանը շեշտեց՝ այդ ինստիտուտը միայնակ չի կարող լուծել այդ խնդիրները, եթե չկա ԱԺ-ի, կառավարության, հասարակության, քաղաքական ուժերի, ՀԿ-ների հետ համագործակցություն:

«Այստեղ իմ ու քո լինել չի կարող: Ես այդպես եմ ընկալում և այդ ընկալմամբ եմ նաև այստեղ ձեր առջև հանդես գալիս: Իմ կողմից դրանք խոսքեր չեն: Ուղղակի ես հավատում եմ և գիտեմ, որ միայն այդ ճանապարհով մենք կարող ենք աշխատել»,-ասաց Խաչատուրյանը:

Անդրադառնալով 90-ականներին քաղաքային խորհրդում իր աշխատանքներին, որի շուրջ որոշ մեկնաբանություններ էին եղել, ասաց, որ այն ժամանակ ընտրվել է ընդդիմության կողմից:

Արսեն Թորոսյանն էլ վստահություն հայտնեց, որ Խաչատուրյանն իրապես լինելու է ՀՀ բոլոր քաղաքացիների նախագահը, որի համար էլ առաջադրել են հենց նրա թեկնածությունը:

Խաչատուրյանը հավելեց՝ Սահմանադրությունում առաջնային, երկրորդային որևէ հասկացողություն չկա՝ բացի անփոխարինելի հոդվածներից: Ըստ նրա՝ բոլոր ինստիտուտները հավասար են, բոլորի համար պետության մեջ տեղ կա՝ իրենց պարտականություններն իրականացնելիս:

«Ուղղակի բոլոր ինստիտուտները պետք է այդ պարտականությունները կատարեն: Մեզ մոտ խնդիրները շատ դեպքում առաջանում են նրանից, որ այն ինստիտուտները, որոնք կոչված են աշխատելու, ուղղակի չեն աշխատում և իրենց պարտականությունները չեն կատարում»,-ասաց նա՝ դա համարելով խնդիր, որը միասին լուծելու կարիք  է տեսնում: