Դատախազությունն ամբողջությամբ հրաժարվել է իր պահանջից

«Հրապարակը» գրում է․

«Հակակոռուպցիոն դատարանում, դատավոր Ռուդոլֆ Ավագյանի նախագահությամբ, այսօր՝ հուլիսի 16-ին, տեղի է ունեցավ ԵՊՀ իրավաբանական ֆակուլտետի նախկին դեկան, ՀՀ արդարադատության խորհրդի նախկին անդամ Գագիկ Ղազինյանի և նրան փոխկապակցված անձանց ենթադրյալ ապօրինի ծագում ունեցող գույքի բռնագանձման գործով դատական հերթական նիստը։

Եւ այդ նիստի ժամանակ դատախազությունն ամբողջությամբ հրաժարվել է Գագիկ Ղազինյանի դեմ ներկայացված հայցապահանջից: Ըստ ամենայնի, սա Սահմանադրական դատարանի որոշման հետ է կապված: «Հրապարակի» հետ զրույցում Գագիկ Ղազինյանը տեղեկացրեց, որ դեռ մանրամասներին տեղյակ չէ, քիչ առաջ է տեղեկացել դատարանի որոշման մասին` իր պաշտպաններից:

Հարցին, սպասելի՞ էր, որ դատախազությունը կհրաժարվի իր իսկ ներկայացրած հայցադիմումից, Իրավաբանականի նախկին դեկանն ասաց, որ օրենքի տեսանյունից դիտարկելու պարագայում, հատկապես որ սիրում ենք իրավունքի և օրենքի գերակայությունից խոսել, հատկապես Սահմանադրական դատարանի որոշումից հետո, երբ հստակ ընդգծվեց նման վարույթների նախաձեռնման հիմքերը, ժամկետները, դա ենթադրելի էր:

«Եթե օրենքի տեսանկյունից ենք դիտարկում, ապա` այո, դատախազությունը պիտք է հրաժարվեր, որովհետև եթե դիտարկում ենք, որ պաշտոնավարումից հետո միայն ձեռք բերված գույքը կարող է դիտարկվել որպես ապօրինի, դա դեռևս հարցական էր, պետք է վիճարկել և այլն:

Օրենքով նշված սահմանը, նույնիսկ իրենց հաշվարկներով` այդ 50 միլիոնը, չէր գերազանցում՝ շատ-շատ ավելի քիչ էր:

Եթե իրենց տեսանկյունից դիտարկենք պաշտոնավարումը՝ արդարադատության խորհրդի անդամ, հասարակական հիմունքներով՝ 2013 թվականից: Նրանք դա էին դիտարկել որպես պաշտոնավարման սկիզբ, որովհետև ես ուրիշ պետական պաշտոն չեմ զբաղեցրել»,- ասաց Ղազինյանը:

Օրենքն ասում է, որ կարող է դիտարկվել 50 միլիոն և ավելի դրամի ապօրինի գույքի առկայությունը՝ դա օրենքի պահանջն է, և ուսումնասիրությունը պետք է սկսվի պաշտոնավարման ժամկետի մեկնարկի պահից: Իսկ արդարադատության խորհրդի անդամի կարգավիճակը որպես պաշտոն ներկայացնելը խիստ վիճարկելի էր:

Իսկ Սահմանադրական դատարանի որոշմամբ, պետք է վերանայվեին բոլոր նման գործերը եւ պետք է հաշվարկը սկսվեր մարդու` պաշտոն զբաղեցնելու օրվանից սկսած: Ըստ դատախազության, Ղազինյանի ապօրինի գույք էին համարվել մեկ տուն, մեկ ամառանոց, որոնք նա ձեռք էր բերել ավելի վաղ շրջանում:

Իսկ իրենց մատնանշած 2013 թվականից հետո ձեռք բերված գույքը 50 միլիոնից պակաս էր, ուստի չէր կարող ի սկզբանե այդ վարույթը նախաձեռնվել:

Օրենքով սահմանված շեմը չէր հատում: «Օրենքի տեսանկյունից Դատախազությունն առաջնորդվել է օրենքով և դատարանի որոշմամբ»,- եզրափակեց Գագիկ Ղազինյանը: