Անքնություն Կիևում. ինչպես են բնակիչները դիմակայում Ռուսաստանի գիշերային հարձակումներին

Արդեն երկու ամիս է, ինչ Կիևը գրեթե ամեն գիշեր հայտնվում է Ռուսաստանի հրթիռային ու դրոնային հարձակումների տակ։ Քաղաքացիները, ինչպես 27-ամյա Դարյա Սլավիցկան՝ իր երկամյա որդու հետ, ստիպված են գիշերել մետրոյում՝ փորձելով մի քանի ժամ հանգստանալ հարձակումներից ապահով վայրում։ 2025-ի հունիսին մայրաքաղաքի մետրոյում ապաստանել է շուրջ 165,000 մարդ՝ հինգ անգամ ավելի, քան նախորդ տարի։ Ըստ Կիևի ռազմական վարչակազմի՝ հարվածների արդյունքում տարեսկզբից սպանվել է 78 մարդ, վիրավորվել՝ ավելի քան 400-ը։

Անքնության և մշտական սթրեսի հետևանքները խորանում են։ Գիտնականները զգուշացնում են՝ քնի պակասը կարող է խիստ բացասաբար ազդել ինչպես մարդկանց առողջության, այնպես էլ երկրի տնտեսության վրա։ Ուկրաինայում 2024-ին անցկացված ուսումնասիրությամբ պարզվել է, որ քաղաքացիների 88%-ը քնի լուրջ խնդիրներ ունի։ Մարդիկ ստիպված են գիշերները ապաստանել մետրոյում, տեղադրել «կյանքի պատյաններ» իրենց տներում կամ ընդունել հանգստացնող դեղամիջոցներ՝ պարզապես գոյատևելու համար, փոխանցում է Reuters-ը։

Դարիան այժմ պլանավորում է փափուկ ներքնակ գնել՝ մետրոյում գիշերելը մի փոքր ավելի տանելի դարձնելու համար։ Իսկ որոշ բնակիչներ, ինչպես գործարար Կատերինա Ստորոժուկը, սեփական միջոցներով կառուցում են ուժեղացված ապաստարաններ՝ գիշերը խաղաղ քնելու համար։